Кышкы узун дыштанылга үезинде ада-иелерниң бүрүн харыысалгазынга турар назы четпээн ажы-төлге хамаарыштыр Тываның девисээринде Комендант шагы чарлаттынганын катап база сагындырары артык эвес.
Он сес харга чедир уругларның хоойлу езугаар төлээлериниң үделгези чокка кудумчуга, хөй-ниити черлеринге, машина-балгат иштинге 21.00 шактан 07.00 шакка чедир чоруурун чөпшээревес.
Хоойлу-дүрүмнүң күүселдезин хынаары-биле тус черлерниң профилактика субъектилери: иштики херектер органнарының ажылдакчылары, хоорай-суму чагыргалары, башкылар, эмчилер, социал ажылдакчылар, хөй-ниити чөвүлелдери, ада-иелер болгаш улусчу дружина кежигүннери – бадылап каан ээлчег ёзугаар үнүүшкүннерни кылып, хыналдаларны чорудуп турар.
Бо ажылдың кол сорулгазы – назы четпээн уруглар аразынга кем-херек үүлгедиишкиннерин болдурбазы, айыыл-халапка таваржы бербезин дээш баш бурунгаар хемчеглерни алыры болгаш оларның эрге-ажыктарын камгалаары деп билип чорууру чугула.
Ынчангаш Чаа чылдың дыштанылгазында уруг-дарыыңар-биле өг-бүлениң культурлуг дыштанылгазын шын организастап, кезээде кады турарыңарны болгаш уттундурбас, чылыг сактыышкыннарны арттырып каарын күзедивис.
Чуруктарны ТР-ниң Чазааның парлалга албанындан алган.
