Тыва Республиканың 2019 чылдың июль 13-те үндүргени 1489-3 дугаарлыг «Бичии уругларның кижизидилгезинге болгаш өзүп сайзыраарынга багай салдар чедирбес хемчеглер дугайында» деп доктаал ёзугаар кежээкиниң 22.00 шактан эртенгиниң 6.00 шакка чедир назы четпээн уруг-дарыгның хөй-ниити черинге ада-иези чокка турары хоруглуг. Бо айыттынган «комендант шагын» шыңгыы сагыырын сагындырып турар. ИХЯ-ның ажылдакчылары ол талазы-биле үнүүшкүннерни доктаамал чорудуп турар.
Ук хоойлуну хажыткан хамаатылар административтиг торгаалга онаажыр. Хоойлу-дүрүмнүң күүселдезин хынаары-биле тус черлерниң профилактика субъектилери: иштики херектер органнарының ажылдакчылары, хоорай-суму чагыргалары, башкылар, эмчилер, социал ажылдакчылар, хөй-ниити чөвүлелдери, ада-иелер болгаш улусчу дружина кежигүннери – бадылап каан ээлчег ёзугаар үнүүшкүннерни кылып, хыналдаларны чорудуп турар.
Бо ажылдың кол сорулгазы – назы четпээн уруглар аразынга кем-херек үүлгедиишкиннерин болдурбазы, айыыл-халапка таваржы бербезин дээш, баш бурунгаар хемчеглерни алыры болгаш оларның эрге-ажыктарын камгалаары деп билип чорууру чугула.
Ажы-төлге айыыл чок чорукту тургузары, оларны камгалап хайгаараары — ада-иелерниң улуг харыысалгазы. Ынчангаш, хүндүлүг ада-иелер, ажы-төлүңерни улуг кичээнгейге ап, хайгааралыңарны кошкатпаңар!
Бистиң корр.
Чурукту интернет четкизинден хоолгалаан.
“Шын №2 2025 чылдың январь 22