«Келир үеже билет»
Мындыг аттыг төлевилелди «Өөредилге» национал төлевилелдиң деткимчези-биле тургускан. Бо төлевилел доозукчу класстарга келир үеде профессионал мергежилин шилип алырынга дузалаар.
Төлевилелди боттандырар сорулга-биле «Өлчей» лицейниң доозукчуларынга Ак-Довурактың даг техникумунуң «Повар, кондитер» мергежилиниң башкызы Татьяна Викторовна Дворкова мастер-классты эрттирген. Дуржулгалыг башкы лицейжилерге соустуг наггетсылар кылырын өөреткен.
Школачы чемненилге неделязы
Чеди-Хөл кожууннуң өөредилге албан черлеринге ноябрь 21 – 25 хүннеринде Школачы чемненилге неделязын чарлаан.
Школачыларга өөредилгеден дашкаар үеде кадык болгаш хемчээлдиг чем дугайында лекция, беседаларны чоруткан. Уруглар аъш-чемниң кижиге ужур-дузазының дугайында база аъш-чем дугайында үлегер домактар болгаш чечен сөстер, чемненир оран-савага бодун канчаар алдынарының чурумун билип алганнар.
Ол ышкаш ажыктыг чем деп чүл ол, ол чүге янзы-бүрү болурул деп айтырыгны чугаалашкан.
Чүгүрүк салаалар
Ам база Сарыг-Септиң уругларның уран чүүл школазының өөреникчилери тергиидээн. Декабрь 26-да хоорайжаан Каа-Хемге фортепиано клазының өөреникчилериниң аразынга «Чүгүрүк салаалар» деп республика чергелиг мөөрей болган. О.А. Панова башкының өөреникчизи Дарина Лопсан I чергениң лауреады атты алган. Тиилекчиге диплом, кубок база акша шаңналын тывыскан.
Чурагайлыг кабинеттер
«Чурагайлыг өөредилге хүрээлеңи» деп федералдыг программаны боттандырары-биле Чөөн-Хемчик кожууннуң 5 школазынга – Хайыракан, Чыргакы, Хорум-Даг, Ийме болгаш Элдиг-Хем школаларынга чурагайлыг кабинеттерни ажыткан.
«Алдын кушкаш» тергиидээн
Тывага кадыы кызыгаарлыг улус аразынга I республика чергелиг фестиваль болган. Бии-Хем кожууннуң инвалидтер эвилелиниң командазы «Алдын кушкаш» деп ойнаар-кыстар шиизин бараалгаткаш, 1-ги черге төлептиг болганнар. Олар «Тергиин шии», «Тергиин театр коллективи» деп номинацияларга база тиилээннер.
А. АРАКЧАА белеткээн.
Чуруктарны интернеттен алган.
