Кидис идик шывадап, чагы бажы үнүп...
Кидис идик шывадап, чагы бажы үнүп...Мөңгүн-Тайга кожуунга кышты үдээр, часты уткуур байырлал – Масленица неделя дургузунда кончуг солун болуп эрткен.
Мугур-Аксының албан организацияларының аразынга болган орус улустуң кожаңнар мөөрейинге “Чечек” уруглар садының коллективи тиилекчи болган. Ол ышкаш аъш-чем делгелгезинге коллектив бүрүзү киржип, чогаадыкчы чоруун көргүзүп, хөй янзы амданныг блиннерни делгеп, чыылганнарны магадаткан.
Байырлалдың спортчу хемчеглери дыка хөглүг эрткилээн. Чижээ, “Кидис идик шывадаар” маргылдаага бирги черни Белек Салчак алган. 50 килограмм шоодайда далган көдүрер эр улус аразынга мөөрейге Адыгжы Салчак 44 катап көдүргеш тиилээн. 25 килограмм далган көдүреринге херээжен улус аразындан Алдынай Донгак 41 катап көдүргеш, тиилекчи болган. Кыш үделгезиниң байырлалында база бир албан болур мөөрей – “Чагы бажы үнери”. Бо кашпагайлар мөөрейинге шупту 13 кижи киришкен. Түңнелинде чагы бажында азып каан белекти Чиңгис Салчак чаалап алган.
Найыралды быжыктырган байырлал
Эрткен неделяның дургузунда уламчылаан Масленица байырлалы Каа-Хем кожууннуң суму бүрүзүнге кончуг солун эрткилээн. Кундустуг суурнуң “Челээш”, Суг-Бажының “Шончалай” уруглар садтарының 5 башкызы 7 аңгы шөлчүгешке болгулаан солун оюн-тоглаалыг хемчеглерге идепкейлиг киришкен.
Оларның чогаадыкчы удуртуп эрттиргени хороводтар, орус улустуң оюннары, мөөрейлери болгаш хөглүг кожаңнарынга чыылганнар идепкейлиг киржип, бот-боттарынга чүгле экини, тайбың амыдыралды, быжыг эп-найыралды күзеп, өөрүшкүлүг тарааннар.
Бай-Хаакка Масленица
Бай-Хаакка ТР-ниң школа назыны четпээн уруглар өөредилгезиниң ажылдакчылары чыглып, Масленица байырлалынга киришкен.
Часты үдээн чараш байырлалды шак мынчаар кожууннарга чыглып демдеглээр чаагай чаңчылды республиканың кижизидикчи башкылары эрткен чылдан тура Кызыл кожуундан эгелээн. Бо удаада Таңды кожуун эстафетаны хүлээп алган.
Бай-Хаакта А.Б. Сагды аттыг культура бажыңынга орус чоннуң национал өңгүр костюмнарын кеткен аңгы-аңгы коллективтер столдар сыңмас кылдыр аъш-чемин делгеп, ыр-шоорун бадырып, баштак кожаңнары-биле чыылганнарны өөрткен.
Найыралды быжыктырган байырлалга Анжела Серен-оолдуң удуртканы "Дамырак", Светлана Афанасьеваның удуртулгазы-биле "Сударушки" ансамбльдер болгаш Шончалай Серен-оолдуң удуртканы "Солнышко" танцы студиязы, “Золотой ключик” Бай-Хаактың уруглар садының коллективи солун оюн-көргүзүүн бараалгаткан.
Улаштыр каткы-хөглүг оюннар кудумчуга уламчылаан. Чыглып келген уруглар садтарының кижизидикчи башкылары арыг агаарга мага хандыр дыштанып алырынче чонну хаара туткан.
Аныяк өг-бүлеге деткимче
Эрткен неделяда “Аныяк өг-бүлеге чурттаар оран-сава хандырылгазы” программа-биле Тожу кожууннуң чурттакчызы Степан Левинниң өг-бүлезинге сертификатты тывыскан. Аныяк өг-бүле алган сертификадын бажың садып алырынче, чаагайжыды туттунган чаа хөй аал чурттаар бажыңдан квартира садып алырының баштайгы дадывыр төлевиринче болгаш ипотека төлээринче ажыглап болур.
К.МОНГУШ белеткээн.
Чуруктарны кожууннарның социал четкилерде арыннарындан алган.
“Шын” №7 2026 чылдың февраль 26