Кызыл хоорай биле Красноярск аразында чоннуң аргыжылгазының хемчээлин кичээп көргеш, ук агаар аргыжылгазын чорудуп турар “КрасАвиа” компаниязы Тываның удуртулгазының дилээ-биле немелде авиарейстерни кииргениниң дугайында Тываның Баштыңы Владислав Ховалыг дыңнаткан:
«КрасАвиа» компания бисче уткуй базымны кылып, Красноярск хоорайдан Кызылче рейстеринге немей пятница болгаш улуг-хүн санында ужар ийи рейсти немей ажыткан. Агаар-биле аргыжылганың өртээ чиик, чаңгыс талазынче 3700 рубль. Уругларга болгаш пенсионерлерге өртээ оон-даа чиик – 2500 рубль. Республиканың чурттакчыларынга канчаар-даа аажок таарымчалыг. Авиарейстерниң өртээ чиик болурга, республикага аалдап кээр туристерниң саны база көвүдээр деп санап турар мен. Туристер национал байырлалдарга киржип, чонувустуң бот-тускайлаң культуразы-биле таныжып ап болур. Агаар-бойдуска дыштанырынга ынактарга база балыктаар, аңнаар, хемге эжиндирер арга бар.
Авиарейстерниң аай-дедир чоруур чуруму Тываже дыштаныр хүннерде туристээр турларны нептереңгейжидеринге база улуг дузалыг. Ооң-биле чергелештир бистиң туроператорларывыс, агентилелдеривис болгаш ниитизи-биле Тывада туризм талазы-биле бизнес хөй аалчыларны хүлээп алырынга белен турар ужурлуг”.