Шагаан-Арыгның ЧЭТ-ке озал-ондак үезинде когараан кижи Красноярск крайның клиниктиг эмнелгезиниң реанимацияга ийи ай чытканының соонда, регионалдыг өртең төвүнүң реанимация салбырындан өртең хирургиязының салбырынче шилчээн.
Өртең салбырының эргелекчизи Андрей Хлебников база бир аарыг кижиниң байдалы экижээни-биле, төрээн Тывазынче үндүр бижээнин дыңнаткан. Ам крайның өртең салбырында үш кижи арткан, оларның бирээзи чоокта чаа кезиишкинни эрткен. Бир эвес план езугаар чоруткан эмнээшкин үре-түңнелдерни бээр болза, шупту аарыг кижилерни майның төнчүзүнде үндүр бижиптерин өртең хирургу тайылбырлаан.
Красноярск крайның эмнелгезиниң кол эмчизи Егор Корчагин биле Тыва Республикадан Күрүне Думазының депутады Айдың Сарыглар Шагаан- Арыгның ЧЭТ ажылчыннарының Тывадан чеде берген төрел-дөргүлү-биле март 21-де ужурашканын сагындыраал. Крайның эмчилери аарыг кижилерниң байдалы аар-даа болза, оларны эмнээр дээш бар-ла аргаларны кылырын ынчан кол эмчи чугаалаан.
Тываның Кадык камгалал яамызының медээзи-биле алырга, Шагаан- Арыг ЧЭТ-ке когараан 23 кижиниң 16-зы эмнеткен соонда, амгы үеде ажылдап турар. Үш кижи амбулаторлуг эмнээшкинде, база үш кижи Красноярск крайның эмнелгезиниң өртең салбырында ам-даа эмнедип чыдар, оларның байдалы ортумак аар деп санаттынар.
Бистиң корр.
Чурукту интернет четкизинден алган.
«Шын» №35 2024 чылдың май 15
Красноярскыда эмнээшкин май төнчүзүнде доостур
16 мая 2024
21