Хоорай бажыңнарынга кранында суг кайыын кээп турарыл? Тываның төвү Кызыл хоорайның чурттакчы чону болгаш аалчылары хүннүң-не чүс-чүс литр сугну ажыглап турар. Чамдык улус сугну садыглардан садып ижер, чамдык хөй квартиралыг бажыңнарда болгаш офистерде кранда суг кайыын келгенин-даа херексевейн, сугну крандан аксып ижиптер.
«Правобережный» КХН-ниң «Суг дамчыдар системалар» участогунуң даргазы Роман Поманисочкин хоорайже сугнуң кайыын кээп турарын тайылбырлаан:
– Квартираларже арыг суг тускай суг чыыр черлерден кээп турар. Своротокта суг сордурар черде 40 метр ханы 24 скважина бар. Сугну чер адаандан үндүр сордуруптарга, суг шыгжамырынче агар, аңаа бактериялар узуткаар азы гипохлорит натрий-биле холушкаш, ооң соонда суг дамчыдар системаже киргеш, квартираларда суг четкилеринче киир ага бээр.
«Суг четкилеринче агар сугну айыткан норма езугаар халдавырлыг бүдүмелдерден арыглаар. Бистиң республикавыстың суу дыка ханы черден кээп турар. Ынчангаш кристалл дег арыг болгаш онзагай арыглаашкын-даа негеттинмес.
Чоокта чаа социал четкилерге көвүрүг адаанда хоолайдан хирлиг суг агып чыткан дээн видео тарай берген. Ук медээге хамаарыштыр эксперт дараазында түңнелди үндүрген:
– Видеода шагда-ла ажыглалдан үнген хоолайны көргүскен. Херек кырында ол хоолайдан аккан сугда кандыг-даа хоралыг бүдүмелдер чок, а элезинниг, дойлуг, довурактыг, даттыг суг агып чыткан. Ындыг чүүлдер квартираларда эрги краннар септелгезиниң үезинде түр үеде тыпты берип болур. Суг агар эрги трубалар дадаргаш, септелге соонда бора суг ага бээр чылдагааны ол.
А.Ондар белеткээн.
"Шын" №59, 2023 чылдың август 9