Бөгүн Куңгуртугда Хүнчүгеш аттыг 60 олуттуг чаа уруглар сады ажыттынган дугайында Чазак Даргазы Владислав Ховалыг ВКонтакте-де бодунуң блогунга бижээн.
"Чедери берге, ырак-узак суурга биче хемчээлдиг тудуг объектизин тудары чеже-даа нарын-берге турган болза, шупту демнежип, күжүвүстү мөөңнеп тургаш, кылып шыдаптывыс.
Коллективти Руслана Бадарчиевна Сандак удуртуп турар. Тус черниң ажыл чок турган чурттакчыларынга ажылга тургустунуп алыр арга база тыптып келген.
Амгы үеге дүүштүр туттунган чаа уруглар садында салдынган дериг-херекселдер үзүк-соксаал чок ажылдап турар болзун дээш, эрги дизель-биле ажылдаар генераторну оон-даа күштүг чаа генераторга солаан. Ынчалдыр Куңгуртугда чаа уруглар садындан аңгыда, чаа генератор база салдынган.
Бичии тере-хөлчүлерни өөредип-кижизидер коллективтиң ажылынга чедиишкиннерни күзедим. Найысылалдан ылгалбас эки байдалдарга эртем-билиг чедип алыр арганы чаштарга бергенивиске өөрдүм" - деп, ол демдеглээн.
