2024 – 2025 чылдың одалга сезону сентябрь 15-те эгелээн. Бо сезонда 129 социал албан черлеринче 16 муң ажыг тонна хѳмүр-дашты сѳѳртүрү планда көрдүнген. Ажыл уламчылап турар.
Кожууннарда болгаш Кызыл хоорайда хөмүр-даш складтары сентябрь 2-де ажылын эгелээн. Ниитизи-биле 33 муниципалдыг склад 200 ажыг муң тонна хѳмүр-дашты чонга садып турар.
Күрүне ачы-дузазы (Госуслуги) таварыштыр «Хѳмүр-даш продукциязы» күрүнениң информастыг системазы-биле куар-код ап алгаш, ооң-биле хѳмүр-даш садып алыр апарган.
Чуртталга-коммунал ажыл-агый яамызының тайылбырлап турары-биле, эрткен одалга сезонунда ажыглаттынмайн барган куар-код-биле хѳмүрнү бо чылын база садып ап болур, бо чылдың куар-кодун база ажыглап болур. Хѳмүр хереглекчилериниң эрткен чылгы лимиттерин сентябрь 15-те чаартыпкан болгаш, эрткен чылын албайн барган улус системада кѳстүп турар. Эрткен чылын хѳмүрүн садып албайн, куар-кодун чидирип алган улус Күрүне ачы-дузазындан катап база үндүрүп ап болур. ТР-ниң Чуртталга-коммунал ажыл-агый яамызының медеглээни-биле алырга, ук системада чаартылгаларны киирген. Ынчангаш хөмүр-даш садарда, бүрүткеткеш, QR-код алыры 1–3 минутаның ажылы апарган. Билдинмес айтырыглар тургустунуп келзе, дараазында дугаарларже долгаар: 5-15-49 база 5-16-86 азы тус черлерниң чагырга черинге, бир болза кожуун төптеринде хөй функциялыг төпке документилерин тудуп алгаш, чеде бээр.
А.ОНДАР.
«Хөмүр-даш продукциязы» КИС-ке Күрүне ачы-дузазы таварыштыр канчаар бүрүткедирил?
1. Дараазында айтыгже базыпкаш (браузерниң диледир черинге бижипкеш), (hrrps://сpgu.rtyva.ru/) азы QR-код-биле Күрүне ачы-дузазынче киргеш, ВОЙТИ деп бижикти базар.
2. Ооң соонда «ЗАЯВИТЕЛЬ» деп бижикти баскаш, улаштыр «КАРТОЧКА ДОМОВЛАДЕНИЯ» деп бижикти шилиир.
3. Ажыттынып келген арында «СОЗДАТЬ», оон «НАЧАТЬ» деп бижиктерни ээлчег езугаар базар.
4. Чаа арын ажыттынып келир. Долдурар ужурлуг хос одуругларны документ езугаар долдурар.
5. Бүрүткелче чагыгны ийи ажыл хүнүнүң дургузунда хынаан соонда, кабинедиңерге QR-код тыптып кээр. Хөмүр-даш складындан одаар чүүл садарда, ол QR-код-биле паспортуңарны көргүзүптер силер.
Бир эвес Күрүне ачы-дузазы чок болза:
* Дараазында айтыгже базыптыңар азы ол айтыгны браузерниң диледир черинге бижиптиңер: https://cpgu.rtyva.ru/web/guest/Регистрация-в-системе.
* Ажыттынып келген арынны чурум езугаар долдуруп алыңар.
* Бүрүткелче чагыгны ийи ажыл хүнүнүң дургузунда хынаан соонда, кабинедиңерге QR-код тыптып кээр. Хөмүр-даш складындан одаар чүүл садып алырда, ол QR-код-биле паспортуңарны көргүзүптер силер.
«Хөмүр-даш продукциязы» КИС-ке тус черниң чагырга черин таварыштыр бүрүткедирде:
- Хоорай азы суму чагыргазынче паспортуңар биле СНИЛС-иңер тудуп алгаш, чеде бериңер. Чагырганың специализи силерге тускай бланкыда билдириишкинни долдуржуп бээрге, беш ажыл хүнүнүң дургузунда карточкаңар болу бээр, эртенинде-даа болу бээр кылдыр ажылды чоруда берген.
- Билдириишкинни долдурган соонда, чагырга черинден бодуңарның логиниңерни болгаш паролюңарны ап алыңар (электроннуг почта дамчыштыр-даа ап болур).
- Беш ажыл хүнүнүң дургузунда (оон эрте-даа) хөмүр-даш садарының бүрүткели доостур. Күрүне ачы-дузазынга QR-код көстүп кээр.
Билдинмес айтырыглар тургустунуп келзе, https://t.me/gissupport азы QR-код биле азы Вайберде: clck.ru/35X8tx айтыгже базыпкаш, киргеш, бижиптер.
“Шын” №92 2024 чылдың ноябрь 30
