«Культура» федералдыг национал төлевилелдиң деткимчезин Тыва 2019 чылдан идепкейлии-биле ап эгелээн турган.
Бо хүннерге чедир элээн каш модельдиг ном саңнарын организастап, капиталдыг септелгелерни кылган. «Культура» национал төлевилелдиң деткимчезин ап тура, регион бюджединден база чарыгдалдың каш хуузун дуглаары албан дээрзин сагындыраал.
«Культура» федералдыг национал төлевилелдиң деткимчезин алыры амыр эвес. Тускай мөөрейни эрткен объектилер деткимчени алыр эргелиг. Өвүр кожууннуң М.Б. Доржу аттыг төп ном саңы мөөрейге бо чылын киришкеш, тиилелгени чаалап алган. Ук ном саңының капиталдыг септелгези удавас доостур. Чаа соңгалар, эжиктерни салган. Электри шугумун чаарткан. Оран-саваның иштики ажылдары доозулган. Ном саңының даштын профлист деп тускай тудуг материалы-биле шып каан. Амгы үеде соңгалар биле эжиктерниң кастактарын чаартып турар. Ооң соонда шалазынга линолеум чадар ажыл бар.
Федералдыг бюджеттен кирип келген акшаны оран-саваның капиталдыг септелгезинче, ном саңының фондузун чаартып, чаа номнар садарынче, ном саңының иштин амгы үениң негелдезинге дүүштүрүп, чаа дериг-херексел садарынче, тускай программаже болгаш кончуг дүрген харылзажыр интернет четкизи кииреринче үндүрген.
Суурнуң хөй-ниити ажылынга идепкейлиг киржип, чүгле культура-чырыдыышкынныг эвес, а социал угланыышкынныг ажыл-чорудулганы ном саңы организастап турар. Ном саңында мультимедийлиг болгаш информастыг технологияларны кииргенинден кожууннуң улуг-биче чонун хаара туткан номчулга төвү апаар дээрзи билдингир.
Номчукчуларга эптиг болур кылдыр аңгы-аңгы девискээрлерге чарган: дыштаныр болгаш номчуттунар черлер, номнар шыгжамыры, хемчеглер эрттирер, уруглар медээлериниң, булуңнары база мультимедийлиг зона.
Бо хүнге чедир Тываның 15 ном саңы «Культура» национал төлевилелдиң деткимчези-биле чаарттынган дээрзин сагындыраал.
Бистиң корр.
Чуруктарны интернет четкизинден алган.
“Шын” №71 2024 чылдың сентябрь 18
