Амгы үеде Тыва Республиканың Көдээ ажыл-агый яамызы кожуун чагыргалары-биле кады, кыштаглаашкын үезинде онза байдал тургустунуп келзе дээш, чылдың-на белеткеп турары мал чеминиң курлавырын долдурар ажылды холда алган. Бо хүнде малчыннарга дүрген дузалаарда, муниципалдыг курлавырда 1,2 муң тонна сигенни шыгжаан.
Регионалдыг курлавырже 1,5 муң тонна азы 4 муң ажыг дүрүг сигенни белеткээр ужурлуг. 2023 чылдың кыштаглаашкын үезинде ол курлавырны ажыглаан ажыл-агыйларның мал чеминден ону чыыр. Беш улуг ажыл-агый республика курлавырынче мал чемин эгидер ужурлуг. Оларның чамдыызы өрезин эгиткен болза, артканнары декабрь 1-ге чедир үлүүн хүлээдир.
Республиканың Баштыңы Владислав Ховалыг мал чемин үезинде болгаш чогуур хемчээлге белеткеп, шын кадагалап шыгжаары чугула деп, кампанияның түңнелдеринге хамаарыштыр бодунуң блогунда айыткан. Технологияларны сагывас болза, мал чеми үрелип, малдың продуктулуг чоруу бадып, харын-даа өлүп-хораарынга чедер.
Регионнуң удуртукчузу кыжын улуг хар чаапканда, малчыннарже мал чемин чедирери шаптараазын чок болзун дээш, сиген-ширбиил шыгжаар черлеринче аргыжылганы хыналдага алырын чагырга даргаларынга сүмелээн. Ол ышкаш сиген шыгжаар черлерге өртке удур айыыл чок чоруктуң талазы-биле тайылбыр ажылын чорудары чугула.
Бистиң корр.
“Шын” №88 2024 чылдың ноябрь 16