(Сергей Пюрбюнуң "Чазын черле ындыг болгай" деп шүлүүнүң хөөнү-биле)
Кыжын черле ындыг болгай:
Кылын уйгу чамбы-дипти шуглап алыр.
Мажаалай-даа, күжүген-даа
Маажым таваар ижээй бээрлер.
Балык-байлаң, амытаннар
Баштажып кээп, дунчулай бээр.
Кыжын черле ындыг болгай:
Катап база хамык чүве шириин апаар.
Кударалың оожургадып,
Хуулгаазын хөртүү-биле өпейлей бээр.
Эриккениң терек дөзүн,
Эрик кырын маңган ак хар бүргей алыр.
Кыжын черле ындыг болгай:
Дөспес чүрээң удумзурап, таалай бээр.
Кывар-сугнуң бүлдең чырыы
Төнмес кышкы кежээлерде
өңнүүң апаар.
Кыйырашкан кылаш даажын,
Кыржаң сооктуң хөөмейин
дыңнаксаар сен.
/ Меңги ООРЖАК таарыштыр бижээн.
Чурукту интернеттен хоолгалаан.
"Шын" №1 2026 чылдың январь 15