Кыш үделгези.

Даарта, февраль 26-да, Арат шөлүнге 12 шакта Масленица байырлалы эгелээр.

Масленица – орус чоннуң шаг-шаандан тура кышты үдеп, часты уткаанын демдеглээн байырлалы. Ону бир неделя дургузунда демдеглээр. Хүн бүрүзү аңгы аттыг болгаш ёзу-чаңчылдыг. Понедельниктен средага чедир кызыы, а четвергте делгем Масленица болур.

Баштайгы хүнүнде чаагай аъш-чемни белеткеп, баштайгы изиг блиныны быжырар. Кыштың хоюткузун кылыр сигенни чыып, хар шивээлер, чуңгулар кылып чораан.

Ийи дугаар хүнүнде суурларга оюн-тоглаа эгелээр, байырлалдың хоюткузун тургузар. Келин кыстарның көрүлдезин эрттирер. Средада- аалчылар уткуп, хүндүлээр, күдээлери кат-иезиниң быжырган блинызын чиир дээш, ооң бажыңынга аалдап баар.

Шажын ёзулалы-биле Руська крещение айызын берген соонда, ол байырлалды Масленица азы Сырная седмица деп адаар апарган. Чүге дизе христиан чон Улуг пост сагыыр үезиниң бетинде, чүгле быштак болгаш сүт аймаандан кылган чем чиир, а эът аймаан шуут чип болбас.

Масленица неделязының сөөлгү хүнүнде, кыштың хоюткузун өрттедир. Ынчан кыш үделгези чоннуң хөглээшкиннери-биле уламчылаар, час бодунуң бүрүн эргезинче кирер.