Национал төлевилелдерниӊ ачызында республика хөгжүп, сайзырап турар. Тываныӊ Баштыӊы Владислав Ховалыг «Айыыл чок шынарлыг оруктар» национал төлевилел талазы-биле бо чылдыӊ болгаш келир чылдыӊ планнарыныӊ дугайында ажыл-агыйжы ужуражылганы чоруткан.
«Росавтооруктуӊ удуртукчузу Роман Новиков-биле Москва хоорайга ужураштым. 2024–2025 чылдарныӊ лимиди-биле оруктарны шалыпкын кылырынга немей акша-хөреӊгини бо чылын алган бис. Орук септээриниӊ планын ажыр кылып шыдаанывыс ол. Тывада ниити хериизи 65 ажыг километр 31 орук участоктарын «Айыыл чок шынарлыг оруктар» национал төлевилел-биле септеп кылган.
Республикага транспорт инфраструктуразын хөгжүдеринге деткимчени көргүзүп турары дээш Роман Витальевичиге өөрүп четтиргеним илереттим.
Кызыл — Чадаана аразында Р-257 федералдыг орукта элээн каш участоктарга септелге херек дээрзин чугааладым. Ооӊ ниити хериизи — 65 километр. 2024 чылда ол ажылды эгелээриниӊ аргазын көрүп көөрүн диледим. Регионга эргежок чугула чүүл-дүр. Кызыл — Чадаана аразы улуг аргыжылгалыг орук болгай, аӊаа орук-транспорт болуушкуннары бо-ла болгулаар. Орукту нормативтерге дүүштүр септеп кылыптарга, айыыл чок аргыжып болур апаар. Чолаачыларныӊ боттарындан, машина-техника башкарарыныӊ культуразындан база дыка хөй чүүл хамааржып турар болгай.
Тыва Республика таварыштыр Моол биле Кыдатче чоруур автомобильдиӊ транспорт коридорун тургузарын сайгарып чугаалаштывыс. Маршруттар бар. «Сибирь дугуржулгазы» ассоциацияныӊ транспорт талазы-биле координация чөвүлелиниӊ даргазы болганымда, Новосибирск хоорайга кады хурал эрттирерин Роман Витальевичиге саналдадым» – деп, регионнуӊ удуртукчузу социал четкиде блогунга бижээн.
Р. ДЕМЧИК белеткээн.
«Шын» №97 2023 чылдың декабрь 20
