Тываның найысылалы Кызыл хоорайга келир 2026 чылда болуп эртер Улустар аразының IV буддийжи шуулганга белеткел ажылдары республикада эгелээн деп болур. Шуулганны организастап эрттирер комитет регионнуң транспорт инфраструктуразын экижидер, хоорай, суурларны чаагайжыдар талазы-биле хемчеглерни ажылдап кылган.
Сарыг шажын шуулганы Тываның найысылалынга эртер болган чүве төлээде, Кызыл хоорайның чаагайжыдылгазынче улуг кичээнгейни организастыг комитеттиң ажылдап келген хемчеглеринде угландырган. Оларның аразында Ленин кудумчузунуң септелгези — кылып чорудар ужурлуг кол хемчеглерниң бирээзи.
Кудумчунуң оруунуң шывыын ниитизи-биле кылыннадыры, Комсомольская биле Тыва эки турачылар, Чүлдүм биле Гагарин кварталдарда оруктуң кыдыында “кыраан”, кургаан теректерни туруп каапкаш, орукту дөрт дилиндектиг кылдыр алгыдыр септээр. Ленин кудумчузунуң бо участоктарын алгытканы автотранспорт шимчээшкинин таарымчалыг болдурар. Чадаг кижилерниң кылаштаарынга эптиг болзун дээш, кудумчунуң ийи талазында тротуарларны “брусчатка” плиталар-биле дескилеп шывар.
Ленин кудумчузунуң Комсомольская биле Тыва эки турачылар, Чүлдүм биле Гагарин кварталдарда орукту 2026 чылда экижидир септеп кылыры төп кудумчуну 2027 чылдан ыңай ниитизи-биле чаартыр арганы бээр.
Кызылга 2026 чылда болуп эртер Улустар аразының IV буддийжи шуулганы Тываның найысылалын улам чараш, аянныг кылдыр чаартыр өскертиринге идиг боор.
Бистиң корр.
Чурукту интернет четкизинден хоолгалаан.
“Шын” №45 2025 чылдың ноябрь 20