Найысылалдыӊ 5 дугаар гимназиязында Ангарский №9 деп соӊгулда участогу ажылдап турар. Кызылдыӊ Баштыӊы Ирина Казанцева - ооӊ идепкейлиг соӊгукчуларыныӊ бирээзи. Ол бо гимназияныӊ башкызы, өөредилге-кижизидилге ажылыныӊ талазы-биле директорунуӊ оралакчызы болуп ажылдап турган.
«Киир бижидилгем аайы-биле 1993 чылдан тура черле маӊаа бадылап келдим. Соӊгулда участогунга улус черле хөйү-биле келир. Дыка хөй чүүлдер кампанияныӊ бодундан, депшидип турар кандидаттардан хамааржыр болбайн канчаар. Бо үеде мээӊ участогум хоорайда бадылап келген улустуӊ сан талазы-биле эӊ бедик көргүзүглүг болуп турар дээрзин меӊээ чугаалады. Дүъш мурнунга чедир, соӊгукчулар идепкейлиг бадылаар дээрзинге бүзүрээр мен» - деп, ол демдеглээн.
Бадылаашкынныӊ үш хүн болуру чурттакчыларга эптиг. Кижи бүрүзү бодунга таарымчалыг үени шилип алыр. Эпидемиологтуг байдалды өөренип көөрү база чугула. Чаӊгыс хүнде бадылаар турган үеде дег, соӊгукчулар шуужуп чедип келбес. Оран-саваныӊ иштин агаарладыр, шалазын арыглап чуур болгаш өске-даа чүүлдерни кылырынга үе бар» - деп, Ирина Казанцева тайылбырлаан.
Бадылаашкын сентябрь 9,10,11 хүннеринде эртенгиниӊ 8.00 шактан кежээкиниӊ 20.00 шакка чедир болур.
Бистиң корр.