“Культура” национал төлевилелдиң аайы-биле Кызыл кожууннуң төвү Каа-Хем суурга модельдиг чаа үениң библиотеказының ажыдыышкыны болган. Байырлыг хемчегге Тыва Республиканың Чазааның Даргазының оралакчызы Елена Хардикова, республиканың культура болгаш туризм сайыды Виктор Чигжит киржип, чаарттынган ном саңының ажыттынганының демдээ – кызыл кожааны кескен.
2021 чылдың сентябрь айда “Культура” национал төлевилелиниң аайы-биле модельдиг библиотекалар тургузар талазы-биле омиссияның шиитпири езугаар Кызыл кожууннуң төп кожуун библиотеказы 10 сая рубль саң-хөө деткимчени алган. Ук акшаландырыышкынны септелге ажылдарынче, чаа шагның негелделеринге дүгжүп турар таарымчалыг библиотека девискээрин тургузарынче, интернет четкизинче кирер аргаларны тургузарынче, ном курлавырын чаа номнар болгаш солун-сеткүүлдер-биле четчелеп, немерелээринче база библиотека ажылдакчыларының билиглерин бедидеринче угландырган.
Елена Хардикова чүгле Каа-Хем суурга эвес, а бүдүн Кызыл кожуунга чугула культурлуг, эртем-билиг төвүнүң ажыттынып турарын чугулалап айыткан:
“Бо чылын бир дугаар ажыттынып турар модельдиг библиотека Кызыл кожуунда шак мындыг чаарттынган ийи дугаар ном саңы болуп турар. ниитизи-биле 2019 чылдан тура Тываның аңгы-аңгы кожууннарынга 7 модельдиг библиотека ажыттынган. Оларның бирээзи – Каа-Хем суурда бичии уруглар ном саңы. Бо чылын республикага ам-даа 5 модельдиг библиотекалар ажыттынар. Оларга немей, 2023 чылда 11 билблиотекаларны чаартыр чагыгларны киирген. Ынчалдыр национал төлевилел аайы-биле бүгү Тывада библиотекалар чаартыр ажыл чоруттунуп турары бо”.
Виктор Чигжит ном саңының эп-сеткилдиг кызымак ажылының түңнелинде чаарттынган библиотеканың тыптып келгени ол дээрзин демдеглээн:
“Бо мөөрейге киржир эргени чаалап алырынга чогуур документ-саавырларны шын болгаш билдилиг кылдыр долдурары негеттинер. Ынчангаш ук ажылды чорударынга кожууннуң удуртулгазының база библиотека ажылдакчыларының киирген үлүг-хуузу улуг”.
Бистиң корр.
Мария Сааяның тырттырган чуруктары