Тывада соңгулданың 2 дугаар хүнү эртип турар. Чурттакчы чон бадылаашкынга идепкейлиг киришпишаан, боттарының бодалдарын илереткен.
Кызыл хоорайның 12 дугаар "Ленинский" соңгулда участогунуң соңгукчузу Альберт Дапылдай:
- Соңгулдага киржири, бир дугаарында, мээң хамааты хүлээлгем болур. Башкы кижи болганымда, аныяк-өскенни база төрээн черинге ынак болурун, чуртунуң хөгжүлдезинге үлүг-хуузун киирерин үргүлчү чугаалап турар мен.
Сөөлгү чылдарда бадылаашкынны 3 хүнге чарып кааны эптиг-дир. Күскү үе болгаш, улустуң бажың-балгадында кылыр ажылы хөй болгай. Чай чок апарза, өске-даа хүннерде соңгуп болур. Соңгукчулар-даа, комиссияның кежигүннери-даа эвилең-ээлдек, эп-найыралдыг болганы өөрүнчүг болду.
Тываның соңгулда участоктарында дүн-хүн чокка офлайн видео-бүрүткел ажылдап турарын сагындыраал. Ону 55 соңгулда участоктарында салган. Оон аңгыда 19 соңгулда участогунга бюллетеньнерни электроннуг хевирге санаар комплекстерни ажыглаар.
М. Конгул-оол.