Апрель 12-де Россияда Космонавтика хүнүн демдеглеп турар. 1961 чылда Юрий Гагаринниң космосче бир дугаар ужутканының бо чылын 65-ки чылы болуп турар. Ол юбилейге тураскаадып, Кызылда Баштайгылар шимчээшкининиң идепкейжилери бөмбүрзектиң бирги космонавтызының тураскаалынга чечектерни салып, «Тываның патриоттары» төлевилелди ажылдадып эгелээн.
Республиканың Баштыңы Владислав Ховалыг чаңгыс чер чурттугларынга Космонавтика хүнү-биле байырны чедирген. Регионнуң удуртукчузу Кызылга төрүттүнген шенекчи-космонавт Кирилл Песков МКС бортундан Тывада чаңгыс чер чурттугларынга байырны чедиргени — Космонавтика хүнүнде республиканың чурттакчыларынга улуг чоргаарал дээрзин демдеглээн. Владислав Ховалыгның бодалы-биле алырга, Кирилл Песковтуң космосче ужудуушкуну, күштүг күзелдиг болгаш быжыг соруктуг кижиге шупту чүве болдуна бээр дээрзиниң дорт бадыткалы болур.
Чылдың-на Космонавтика хүнүнде аныяктар болгаш уруглар шимчээшкиннериниң болгаш хөй-ниити организацияларының идепкейжилери Кызылда Юрий Гагаринниң тураскаалынга чечектерни салып турар. Бо чылын «Баштайгылар шимчээшкининиң» кежигүннериниң эрттирип турары хемчегге «ТуваАвиа» авиакомпанияның ужудукчулары болгаш «МИ-8» звенонуң кежигүннери Мерген Кысыгбай биле Антон Адыгаев киришкеннер. Олар «Тываның патриоттары» деп чаа төлевилелге стартты бергеннер. Бо дээрге Баштайгылар шимчээшкининиң «Төөгүнүң кадагалакчылары» деп кол төлевилелиниң регионалдыг хевири-дир. Төлевилел аныяктарга боттарын идип, организасчы, чогаадыкчы, хууда шынарларын көргүзүп, биче төрээн чериниң төөгүзүнге хамаарыштыр билиглерин калбартып, төөгүлүг сактыышкынны кадагалап арттырарынга боттуг үлүг-хуузун киирер арганы берип турар.
Апрель 6-дан 12-ге чедир, бүгү чуртта ышкаш, Тыва Республиканың өөредилге черлери Космонавтика хүнүнге тураскааткан Космос неделязын демдеглеп турар. Неделяның хемчеглери өзүп орар салгалдың патриотчу кижизидилгезинче болгаш космос делгемин шинчилээринге Россияның чедиишкиннериниң дугайында билиглерни бедидеринче угланган.
«Чугула чүүлдер дугайында чугаалар» деп класстан дашкаар ажылдар үезинде ада-чурт космонавтиказының чедиишкининиң 65 чыл оюнче онза кичээнгейни угландырган. Шупту школалар «Космосче орук» деп оюннар программазын организастаан, аңаа өөреникчилер командаларга чарлып алгаш, күш-шыдал, шимченгир болгаш тывынгыр чорук талазы-биле маргылдаалап, «Космос генийлери», «Космоста дүъштеки чем», «Деңзи чок байдал», «Космос корабли», «Сылдыстар бөлүү» дээн ышкаш өөредиглиг оюннарынга киришкеннер.
Бөмбүрзектиң бир дугаар космонавтызының амыдырал-чуртталгазын болгаш маадырлыг чоруунуң төөгүзүн таныштырган «Гагарин. Космоста бирги кижи» деп уран-чечен кинону школачыларга, техникумнар болгаш колледжтер сургуулдарынга көргүскен.
«Россия – мээң делгемнерим» деп курс-биле «Россияның үлетпүрү: космос адыры» деп кичээлдерни эрттирип, делегей космонавтиказында Россияның ролюн, адырны хөгжүдериниң перспективаларын, аныяктарның депшип ажылдаарының аргаларын чырыткан.
Республиканың уруглар садтарынга «Тоолчургу космос» деп темалыг кичээлдер болгаш чурулга шактары эрткен.
ТР-ниң Чазааның парлалга албаны.