Тываның Баштыңы Владислав Ховалыгның даалгазы-биле республиканың Орук-транспорт яамызы Кызылдан өске хоорайларже ужар самолёттар рейстерин немей ажыткан. Ооң дугайында республиканың удуртукчузу бодунуң блогунда бижээн.
Вторник, четверг болгаш субботадан аңгыда, пятница биле улуг-хүнде кежээ Красноярск – Кызыл – Красноярск рейстерге ужуп чоруп болур. Понедельник– субботада, неделяда алды рейсти S7 компания Новосибирск биле Кызыл аразынга апрель айда ажыткан. Июнь 2-ден воскресеньеде рейсти база немээн. Бо угланыышкынга июнь айның чартыында четверг санында дүъш соонда рейсти база ажыдар. Москва – Кызыл – Москва угланыышкынга самолёттар неделяда дөрт удаа ужуп турар. Июнь 16-дан бо рейс бешке чедир көвүдээр. Июнь айның 21-ден Иркутск – Кызыл – Иркутск аразынга самолёт неделяда ийи катап ужар апаар.
S7 авиакомпанияның 170 пассажир олурар А 320 аэробузу Новосибирск биле Кызыл аразынга июнь айның ийиги чартыында ужуп эгелээр. “Бо дээрге шенелде ужудуушкун. Ырак рейстерге ужар бо улуг самолётту бистиң аэропорт хүлээп ап шыдаарын ынчан көргүзер. Кызылды тавартыр А 320 аэробуз ышкаш улуг самолёттар ужар рейстерни чурттар аразынга ажыдар талазы-биле ажылды чорудуп турар бис” — деп, Тываның Баштыңы бодунуң блогунга бижээн.
Ш. МОНГУШ белеткээн
«Шын» №42 2024 чылдың июнь 8
![](https://sun4-20.userapi.com/impg/_Rav3yEtWkBoi77BNT-jvPZzpTCU7VxeoRimMg/Y4iaNX-khbU.jpg?size=807x458&quality=95&sign=4a5197395399666d27a444cb21ddc687&c_uniq_tag=pju0I43HnBCFJGOFRa7y6p2VTsl39UY0vHMEIEBu-yE&type=album)