Тываның Баштыңы Владислав Ховалыг Кызылдың 4 дугаар школазында капитал септелгениң эгезин хынап чораан. Ооң чугаазы-биле алырга, 1975 чылда туттунган школада бо хүннерге чедир чаңгыс-даа чаартылга ажылдары чоруттунмаан.
«Кылыр-тудар ажылдарның хемчээлиниң улуг болганы-биле өөредилге чылының төнчүзүн манаар аргавыс чок болду. Септелгениң ниити өртек-үнези – 77,5 сая рубль. Эде эптээшкинде 30 кижини хаара туткан. Керээлиг организация объектиде ажылчыннарның санын 70 чедир көвүдедирин көрүп турар» – деп, Тываның Баштыңы демдеглээн.
Дөрткү улдуңну өөреникчилер чаа 19 дугаар школага өөренип доозар. Өөреникчилерниң школага чедирилгезин школаның удуртулгазы болгаш найысылалдың чагырга чери организастаан. «Өөредилге албан черлериниң капитал септелгезин чорудар дээн Президентиниң эгелээшкининиң ачызында ийи чылдың дургузунда 40 школаны септедивис. Мында чугаа чүгле үндезин септелгениң дугайында чоруп турар. Херек кырында алыр чүве болза, чаа өөредилге хүрээлели, ылаңгыя көдээ суурларда тургустунуп турар.
Бо чылын Кызылдың 4 дугаар школазындан аңгыда, дыңнаары багай уругларның школа-интернадынга, Сукпак суурда агролицейниң оран-савазынга болгаш Эрзин, Хөндергей база Тээли суурларда үш көдээ школага капитал септелгени чорудар. Бо программаның акша-хөреңгилериниң ниити түңү – 360 сая рубль» – деп, бодунуң блогунга В. Ховалыг бижээн.
«Шын» №26 2024 чылдың апрель 6
