Тываның Баштыңы Владислав Ховалыг Кызылдың Спутник микрорайонунга модульдуг чаа бассейн тудуу эгелээрин дыңнаткан. «Күш-культура болгаш массалыг спортту хөгжүдери» федералдыг төлевилел шугуму-биле төлевилелди боттандырып, республика бюджединден 3 сая рубль кады акшаландырыышкынны киириштирер.
«Кызылывыс өзүп, сайзырап турар. Чаа тудуглар, кудумчулар, бүдүн-бүдүн микрорайоннар туттунган. Ынчангаш ол чурттакчылыг чаа черлерни шынарлыг спортчу инфраструктура-биле хандырары – бистиң мурнувуста кол айтырыг» — деп, регионнуң Баштыңы бодунуң блогунда спортчу объект тудуу эгелээнин дыңнаткан.
Спутник микрорайонунуң инфраструктуразы сөөлгү чылдарда көскүзү-биле хөгжүп турар: амгы үениң чуртталга комплекстери болгаш социал объектилер туттунуп, хөй-ниити шөлдери чаагайжыттынып турар. Амгы үеде ол микрорайонда ийи улуг школа, ийи уруглар сады, ажык шөлде күш-культура-кадыкшылга комплекизи, Культурлуг хөгжүлде төвү ажылдап турар. Бо бүгү объектилер хоорайның таарымчалыг хүрээлелин тургузарынга идигни берген.
Регионда чайын эштир үе кыска болганындан бүдүн чыл дургузунда эштир арганы бээр бассейнни тудуп алыры эң эки дээрзин Владислав Ховалыг демдеглээн.
Модульдуг бассейнни амгы үениң дериг-херекселдери, суг арыглаар системалар-биле дерип, уругларга болгаш улуг кижилерге айыыл чок байдалды тургузар. Ол ышкаш солуттунар өрээлдерни, душтаныр черни база администрация кабинеттерин аңгылап кылыр.
Бассейнниң чанынга улуг-бичии кижилерниң күш-шыдал белеткелин калбартыр арганы бээр модульдуг спорт залы база туттунар деп, Владислав Ховалыг чугаалаан.
ТР-ниң Чазааның парлалга албаны.
“Шын” №40 2025 чылдың октябрь 16
