Бөгүн, май 9-та, найысылал Кызылга Арат шөлүнге Ада-чурттуң Улуг дайынының Тиилелгезиниң 78 чылынга тураскааткан байырлыг чыскаал болуп эрткен.
Тываның Баштыңы Владислав Ховалыг видео таварыштыр чыылган чонга байырын чедирип, байырлыг чыскаалды ажыткан. Амгы үеде ол Луганск республиканың девискээринде чоруп турар.
2023 чыл Тывага онзагай чыл болурун ол демдеглээн. Чүге дээрге бо чылын сентябрь айда фронтуже тыва эки турачыларның фашистер-биле дайылдажыры-биле чорутканындан бээр 80 чылы болур.
"Дайынчы алдарның чылдарының төөгүзүн бистиң Ада-чуртувустуң камгалакчылары уламчылап турар. Тускай шериг операциязының баштайгы хүннеринден тура бистиң оолдарывыс мурнуку одуругда тулчуп чоруп турар" - деп, Тываның Баштыңы чугаалаан.
Улаштыр Арат шөлүнге Кызылдың президентиниң кадеттер училищезиниң, Россияның ТР-де Шииткел күүседир федералдыг албанының эргелелиниң, ОБЯ-ның, суд приставтарының болгаш өске-даа чепсектиг күштер органнарының төлээлери марштап эрткен.
Байырлыг чыскаалдың онзагай чүүлү ТР-ниң Чазааның үрер хөгжүм оркестриниң аъттарлыг көргүзүү болган.
Ооң соонда найысылалдың чурттакчыларынга болгаш аалчыларынга республиканың чогаадыкчы коллективтери бараалгаан.
/ Бистиң корр.
Буян Ооржактың тырттырган чуруктары
