Тываның бодунга тарып өстүрген гречканы калбаа-биле чонче үндүр садып эгелээрин ылаңгыя республиканың уруглар садтарының ажылдакчылары четтикпейн манап турар.
Лада Хертек. Кызылдың 17 дугаар уруглар садының эргелекчизи:
– Бистиң республикавыстың көдээ ажыл-агыйының сайзырап турарының көскү чижээ, Таңдыда кырлыг-караны тарып өстүрүп эгелээни деп эскерер-дир мен. Бир эвес ол гречканы республикавыстың садыгларынга хөйү-биле садып эгелээр болза, чон боттуң девискээринге үндүрген бараанны сонуургап, садып ап эгелээр деп бодаар мен. Ооң кадында соңгаартан сөөртүп кээп турар барааннарның өртек-үнези улуг, чамдыкта шынары база шоолуг эвес болур. Уруглар садында ажылдап турар болгаш, эскергеним, бичии уругларның чем чип турарындан, кандыг чемге ынаа көстү бээр. Чижээ, бистиң садикте 10 хонукта ийи катап кырлыг-карадан кылган чемни берип турар бис. Өске чемнерге көөрде, уруглар кырлыг-караны азы “кара-каша”-даа дээр болгай бис, ону албан төндүр чигген болур чорду. Чаштар ол хире ынак турда, республикада тарып өстүрүп эгелээн гречканы уруглар албан черлеринге чедиштирип бээри база күзенчиг. Таңдыда тарып турар гречканы амдыызында чүгле соңгаар чорудуп турар деп дыңнаан бис. Бир эвес тарылга шөлүн улгаттыргаш, ам-даа көвүдедир тарыыр болза, республиканың социал-экономиктиг сайзыралынга-даа, бөдүүн чурттакчыларынга-даа, ону бүдүрүп турар арат ажыл-агыйжыга-даа эки болгу дег.