Тываның Чазаа республика девискээринге бүдүрүлге черлерин тудар болгаш хөгжүдер деп турар инвесторларга немелде деткимче бээринге белен. Ону боттандырары-биле тускай инвестиция төлевилелдерин боттандырып турар бүдүрүлгелерге амы-хуунуң тускай чиигелделерниң механизмин ажыглап турар. Бо чедиликте республиканың Чазаа “Үлетпүр политиказының дугайында” регион хоойлузунче эдилгелерге чүүлдүгзүнүп, ону бадыладыры-биле Дээди Хуралче чоруткан.
Тускай инвестиция комплекизи инвестор биле республиканың азы ооң муниципалитеттериниң аразында дугуржулгазы болур. Инвестор доктааттынган хуусаада “бодунуң азы каттыштырган күш-биле республиканың девискээринге бүдүрүлге черин тудуп-тургузар азы бүдүрүлге продукциязының үндүрүлгезин шиңгээдип алыр” хүлээлгелиг. Аңаа харыы кылдыр республиканың эрге-чагыргалары инвесторга үндүрүг чиигелделерин магадылаар болгаш деткимчениң өске-даа хевирлерин көргүзер.
Тускай инвесткерээлерни 2015 чылдан бээр чүгле федералдыг деңнелге ажыглап турган болгаш ол бодун бүрүнү-биле бадыткаан. Ооң ачызында Россияже тускайлаң технологияларны болгаш боттуг бүдүрүлгелерни киирген. Чижээлээрге, Mazda деп япон компания Владивостокта шимчедикчилер заводун ажыткан, "Клаас" деп немец компания тараа ажаар комбайннарның бүдүрүлгезин Краснодарда таарыштырган. 2019 чылда тускай инвестиция системазының ажыглалын регионнарга болгаш муниципалитеттерге чөпшээрээн.
Тываның Чазааның “Үлетпүр политиказының дугайында” регион хоойлузунче киирип турары өскерилгелери хөй хевирниң деткимчезин хаара тудуп турар. Республиканың эрге-чагыргалары эртем чогаадылгаларын саң-хөө-биле деткиир, бүдүрүлгеге чедир оларның оруунга өмек-дөмек болур, даштыкы рыноктарга чаа продукциязының садып-сайгарылгазынга, садып алыышкыннар системазын таварыштыр барааннарны садып-сайгарарынга дузалаар.
#Шын #ТываЧазак #ҮлетпүрПолитиказы #Ивестиция #Тыва
Үлетпүр бүдүрүлгезиниң адырынга төлевилелдерни деткиири-биле
30 марта 2023
28