''Куруг холдуг эргин артаарга, куруглаар'' азы ''Үлежип билир кижиниң үүлези чиик''.
Чүге ынча дээрил? Бо ужурнуң база бир өске тайылбыры азы чылдагааны бар. Бо оран-делегейде чүнү-даа алырда, баштай өртээн үндүрүп төлээр болур деп бойдустуң, амыдыралдың дүрүмнериниң бирээзи-дир. Алган кижи бээр апаар, берген кижи алыр апаар. Амыдыралда халас чүве чок деп чүүлдү өгбелеривис билир. Чонну өөртүрге, чорук-даа бүдүнгүр. Өгбелеривистиң бо үнелиг билии уттундуруп бар чыдары амгы хүннерде эскертинип турар. Экономиктиг бергедээшкиннер салдары болгаш өске чоннарның аажы-чаңнарын өттүнчүп турарывыстан деп болур. Өске чүктен келген чигзинчиг чаңчылдарны, аажылаашкынны кызып-кызып өттүнүп турар апарган бис. Ынчангаш тыва аажыга дүүшпес, чүгле бодун бодаар чорук нептереп келгени ооң ужурунда база болуп турар чадавас.
Амгы хүннерге чедир тыва аалчы бичии-даа болза, белекчигештиг баарын кызар. Бо хүннерде ооң ханы утказын, ужурун сагынмас-даа болза, черле ындыг чүве болгай дээш сагып чоруур улус бар, ылаңгыя улгаткан назылыг чон.
Улуг улусту дыңнаарга, ''Үлежип билир кижиниң үүлези чиик'' дээр, ынчангаш чонун өөртүп, белектиг аалдап баар. Бо чаңчыл кижини харам эвес чорукка өөредип, бүгү-ле чүүлдер мээң болзун деп көрүштен хостаар сорулгалыг. Өнчүзүнге ижиккен кижиге амыдыралы берге, чидирии хөй болур деп үе-шагдан эскерген өгбелеривистиң мерген билиин утпайн, сагып чорууру биске артык болбас.
Ольга КУУЛАР.
Чурукту интернет четкизинден алган.
“Шын” №10 2025 чылдың март 20