Бурун чугаа
Шыяан ам. Шаанда беш кара оолдуг ашак кижи чурттап чораан чүвең иргин. Беш оглунуң аттары Шокар-Торга, Шокар-Шаанчак, Дүктүг-Ары, Үзүт-Ховаган, Сыгырга турган. Биеэги ашак үр үеде чурттап келген. Назыны төнүп мөчээниниң сөөлүнде, ачазы өлүрге, беш алышкы олуруп алгаш, сүмелешкен.
Торга тургаш:
— Ачавыстың сөөгүн, эки адавысты маңаа кагбайн, арыг ыяштан хааржак чазап эк- кээйн – дээш, Торга чоруткаш, ыяш соктааш турупкан. Таварышкан ыяжын соктаза-даа, ам-даа соктавышаан, үүлези бүтпээн чүве-дир.
Шокар-Шаанчак ачазының сөөгүн сөөртүр дээш, шары ачылап чоруткаш, шары-даа хамаанчок, инек-даа, бызаа-даа хамаанчок шуптузун сывыртааш чоруп берген, ам-даа келбээн-дир.
Дүктүг-Ары ачазының чевээн каастаар дээш, чечек чулуп аар дээш чоруткаштың, ачазының ажыын ажып, «өө» деп өөңейнип ыглап-ла, чечек бүрүзүнге хонуп-ла, ам-даа чечектеп келбээн.
А ынчаарга Үзүт-Ховаган от чок турган, ачазының доюн хайындырар от оттап аар дээш чоруткаш, чырык черге баргаш-ла, отка дүжүп өлүп-ле, ол-ла хевээр чоруп берген.
А Сыгырга дөрт акызын манаан: кажан-на өртемчей чырый бээр ирги, чырый бээрге, ооң ыыды чиде бээр, дүне кээрге, дөрт акызын кый деп, даңны атсы сыгырып турар болган.
Ол беш алышкының үүлези амдыгаа чедир бүтпээн болгаш, ам-даа бистиң аравыста чоруп чоруур-дур ийин бо.
«Төрээн дылым — чоргааралым» бөлүктен алган.
“Шын” №80 2024 чылдың октябрь 19
