Тываның Чазаа Мөңгүн-Тайга кожуунче чырык шугумун тударын чедип алыр дээш ажылдаар. Тываның Баштыңы Владислав Ховалыг Мөңгүн-Тайгага ажылчын сургакчылаашкын үезинде ону чугаалаан.
Регионнуң удуртукчузу баштаан чазак делегациязы республиканың эң ырак булуңунга ажылчын сургакчылаашкын-биле чораанын сагындыраал. Хыналда ажылдың бирээзи – кожууннуң чырык хандырылгазы болган. Мөңгүн-тайгажыларның бажыңнарынче база социал албан черлеринче чырыкты дизельдиг электростанциядан берип турар. Кожуун төвү Мугур-Аксы суурда бо чылын келген 500 кВт күштүг ийи чырык хандырыкчызы-биле кады шупту беш тургузуг ажылдап турар.
Чырык талазы-биле экижээн-даа болза, келир чылын Кызыл-Хая суурда чаа школаны кожуптар болза, кожууннуң чырык системазынга чүък улгады бээр. Ынчангаш регионнуң удуртукчузу чырык магистралын тудар айтырыг быжып келген деп айыткан.
«Мөңгүн-Тайганың чону-биле ужуражып тура, күзүн Россияның Энергетика яамызынга хурал болуп эртерин дыңнаткан. Аңаа электри шугумун тударының аргазын сайгарарын планнаан. Оларның кайы-бирээзин дүрген чедип алыр бис» — деп, Владислав Ховалыг чугаалаан.
Республиканың эрге-чагыргазы амдыызында дизельдиг чырык станцияларының курлавырын улгаттырар ажылдарны уламчылаар.
Мугур-Аксында тургусканы ышкаш күчүлүг станция Кызыл-Хая суурга келир чылын туруптарын В. Ховалыг дыңнаткан. Амдыызында суурда бар ийи дизель-генераторга немей 200 кВт-тыг чырык дамчыдыкчызын немей салыр.
Чон-биле ужуражылга үезинде хөмүр айтырыы база көдүрүлген. Ылаңгыя Кызыл-Хая суурда ооң өртээ бир тоннада 7 муң рубль чедип турар. Хөмүрнүң өртээн таарыштырып, субсидия бээр арганы өөренип көөр даалганы Тываның Энергетика яамызынга берген.
/ А.МОНГУШ.
Чурукту интернеттен алган.
“Шын” №68 2024 чылдың сентябрь 7
