Июнь 20-де ырак-узак Мугур-Аксы суурга Улуг салгалдың кижилериниң аралажыр төвү ажыттынган. Ол болза Тывада он дугааргы төп болур. Бодунуң ажылын ол байырлыг байдалга Россия Федерациязының Социал фондузунуң Мөңгүн-Тайга кожуунда салбырының клиентилер-биле ажылдаар албанының черинде эгелээн.
Улуг салгалдың кижилериниң аралажыр төвүнүң аалчыларынга тускай өрээлдерни идепкейлиг дыштанылгага болгаш өөредилгеге дерээн. Ында кээп турар кижилер хостуг үезин уран номчулга, кинолар көрүлдези-биле каастап, чогаадыкчы кежээлерни эрттирип, спорт-биле холбажып, аргыттынып, дааранып, саң-хөөге болгаш компьютерге билиин бедидип болур. Тыва чаңчыл ёзугаар аалчыларны сүттүг шай-биле уткуп алган. Оларны кожууннуң Культура бажыңының, “Меңги чечээ” ансамбльдиң бот-тывынгыр артистери, хоочуннарның коллективтери ыр-шоорлуг, танцы-самныг уткуп алган. Төптүң ажыдыышкынынга РФ-тиң Социал фондузунуң Тывада регионалдыг салбырының эргелекчизи Светлана Кенден, Мөңгүн-Тайга кожууннуң чагырга чериниң даргазы Чойган Иргит, күрүне албан черлериниң удуртукчулары, сумулар даргалары, хөй-ниити организацияларның төлээлери, Туран болгаш Кызыл хоорайларның Улуг салгалдың кижилериниң аралажыр төптериниң идепкейжилери киришкен.
«Бо дээрге Улуг салгалдың кижилериниң аралажыр онгу төвү-дүр. Социал фондунуң регионалдыг салбырының бо төлевилели улус-чоннуң деткимчезин алган дээрзин амыдырал көргүзүп турар. Тывада ажылдап эгелээни бир чыл чартык үениң дургузунда Төптер 1400 ажыг хемчеглерни эрттирген, оларга Улуг салгалдың 13 муң кижизи киришкен. Мугур-Аксыда Төп база сорунзаның чери болуп, кожууннуң пенсионерлеринге эш-өөр тып алырынга, бодунуң сонуургалдарын болгаш арга-дуржулгазын хандырар арганы бээр дээрзинге бүзүрээр мен” — деп, Светлана Кенден медеглээн.
Тус черниң чурттакчылары Төптүң ажыттынарын четтикпейн манап турганннар деп, хоочуннар организациязының идепкейжизи Зинаида Салчак чугаалаан: «Төп чаа-ла тургустунуп эгелеп турда, кожууннуң хоочуннары хөй-ниити организациялары демнежип алгаш, чоокку чылдарда ажылының планын тургузуп алганнар».
Улуг салгалдың кижилериниң аралажыр чаа төвү РФ-тиң Социал фондузунуң Мөңгүн-Тайга кожуунда салбырының клиентилер-биле ажыл чорудар албанының ажылдаар шактарында Мугур-Аксы суур, Кыргыс Шөмбүл кудумчузу, б.35 адреске ажылдаар. Чалап тур бис!
А. ХЕРТЕК белеткээн.
“Шын” №48 2024 чылдың июнь 29
