Тываның Баштыңы Владислав Ховалыг Россияда Иелер хүнүнүң бүдүүзүнде хөй ажы-төлдүг ие Айнааш Ондар база ооң уруглары-биле ужурашкан. Бо чылын Ондарларның өг-бүлези Бүгү-россия чергелиг «2025 чылдың өг-бүлези» мөөрейге «Хөй ажы-төлдүг өг-бүле» деп бөлүкке тиилээн.
Айнааш өөнүң ээзи Олимпий Монгуш-биле сес кысты, дөрт оолду азырап өстүрүп чоруурлар. Президент Владимир Путинниң 2024 чылда шиитпири-биле Айнааш «Россия Федерациязының Маадыр иези» деп хүндүлүг атка төлептиг болган. Ажы-төл кижизидилгезинге ачы-хавыяазы дээш хүндүлүг шаңналды алган республикада чаңгыс ие бо.
Тываның Баштыңы байырлал хүнүнде өг-бүлениң чурттаар байдалын экижидеринге чугула базым болур үш өрээл квартираның сертификадын Айнаашка тывыскан.
«Өг-бүлениң ажы-төлү чугаакыр болгаш шыңгыы. Оолдарының бирээзи бокска, хүрешке сундулуг, Тываның ат-сураглыг спортчулары-биле кады белеткенип турарынга дуза кадарынга белен бис»— деп, Владислав Ховалыг демдеглээн.
Республика Баштыңы өг-бүлениң эр ээзи улуг оглу-биле кады тускай шериг операциязының киржикчилери дээрзин дыңнаткан. Бо өг-бүле маадырлыг чоруктуң, күш-ажылга ынакшылдың көскү үлегер-чижээ дээрзин ужуражылга үезинде демдеглээн. Регионалдыг болгаш федералдыг деңнелде хөй ажы-төлдүг өг-бүлелерни деткиир хемчеглер болгаш программаларны ужуражылга үезинде чугаалашкан.
А. МОНГУШ.
Чуруктарны ТР-ниң Чазааның парлалга албанындан алган.
“Шын” №47 2025 чылдың декабрь 4
