Сентябрь 27-де Эрзин кожууннуң Мөрен сумузунга тускай шериг операциязының киржикчизи, «Эрес-дидим чорук» ордениниң (мөчээниниң соонда тывыскан), «Эрес-дидим чорук дээш» деп медальдың эдилекчизи Александр Мунзукович Чоодунуң чырык адынга тураскааткан элээди оолдар аразынга тыва хүреш маргылдаазы бедик деңнелге эрткен. Маргылдааны маадырның иези, ТР-ниң алдарлыг ажылдакчызы Чечекмаа Кыргысовна Сади чоок кижилериниң, дөргүл-төрелиниң деткимчези-биле организастап эрттирген.
Маадырга тураскааткан маргылдаага Эрзинниң сумуларындан, Тес-Хемниң Ак-Эрик сумузундан, Өвүр кожуундан база Кызыл хоорайдан ниитизи-биле 100 ажыг элээди мөгелер киришкен. Ол ышкаш кожууннуң хоочун мөгелери, тренер башкылары спортчу хемчегге хүндүлүг аалчылар болуп келген. Тиилекчи мөгелерге Хүндүлел бижиктер болгаш акша шаңналдарын тывыскан.
А. СОЯН.
Чуруктарны Айдыс САДИ тырттырган.
“Шын” №38 2025 чылдың октябрь 2
