Россияда Ада-чурт Маадырларының хүнүн 2007 чылдан эгелеп декабрь 9-та демдеглеп эгелээн. Төрээн чуртунга кызыгаар чок бердинген, бодунуң ажыл-херектери, эрес-дидим чоруктары-биле амы-тынын харам чокка берип бадыткаан Маадырларның чырык адын мөңгежидип демдеглээр чаагай чаңчыл салгалдан салгалче уламчылаар.
Декабрь 9-та Кызылдың Тиилелге шөлүнге Ада-чурт Маадырларының хүнү болгаш декабрь 3-те демдеглеп турарывыс Билдинмес солдаттың хүнүнге тураскааткан митинг болуп эрткен. Аңаа ТР-ниң Чазак Даргазының ТШО айтырыгларының талазы-биле тускай оралакчызы Тимур Кууларга баштаткан чазак кежигүннери, ТР-ниң Дээди Хуралының (парламентизиниң) депутаттары, күштүг структуралар органнарының, хөй-ниити организацияларының төлээлери болгаш өскелер-даа киришкен.
Тиилелге шөлүнге болган хемчег кажыыдалдың минутазындан эгелээн. Ооң соонда чаңчыл ёзугаар Билдинмес солдаттың тураскаалынга чечек салыр ёзулал болган. Амгы тускай шериг операциязы чоруп турар үеде, эрес-дидим маадырларны адап, сактып демдеглээри улуг ужур-уткалыг. Бистиң үениң Маадырларының аттарын болгаш оларның маадырлыг чоруктарын бүдүн чурт билир.
Ада-чурттуң Маадырларының хүнү Россияның төөгүзү-биле быжыг доңнаттынган. Тывада шупту 15 дайынчы Ада-чурттуң Маадырлары кылдыр санадып турар. Оларның он бири – Ада-чурттуң Улуг дайынының киржикчилери. Күрүнениң мурнунга ачы-хавыяазы дээш Сергей Шойгу 1999 чылда Россияның Маадыры атты алган. Россия Федерациязының Маадыры атты 2022 чылда сержант (бо хүнде лейтенант) Мерген Доңгакка, 2024 чылда улуг лейтенант Чалым Чүлдүм-оолга болгаш биче сержант Буян Кууларга тывыскан.
Чурттуң тайбың-чаагай амыдыралы дээш бажын салган Маадырларга, оларның ажыл-херээн уламчылаан амгы үениң эрес-дидим дайынчыларынга, оларның аразындан кызыл тын-биле холбашкан Маадыр деп бедик атты эдилээннерге Ада-чурт Маадырларының хүнүнге тураскааткан митингиниң киржикчилери чавыс мөгейип, улуг хүндүткелди илереткеннер.
Карина МОНГУШ.
Буян Ооржактың тырттырган чуруктары.
“Шын” №95 2024 чылдың декабрь 11
