СОЛНЕЧНОГОРСК ХООРАЙГА “МААДЫРЛАРНЫҢ ҮЕЗИ” ДЕП ӨӨРЕДИЛГЕ ПРОГРАММАЗЫНЫҢ БАШТАЙГЫ КИРЖИКЧИЛЕРИ-БИЛЕ ВЛАДИМИР ПУТИН УЖУРАШКАН.
Ооң үезинде Президент шериг албанныгларга оларның эрес-дидим маадырлыг чоруу дээш өөрүп четтириишкинниң сөстерин чугаалап, бодунуң төөгүзүнүң дургузунда Россия олар ышкаш Төрээн чуртунга бердинген, кандыг-даа үелерде ону камгалаарынга белен кижилерниң ачызында күрүнениң туружун быжыглап келген дээрзин демдеглээн.
"Амы-тынын артынга каггаш, Ада-чуртунга ак сеткилдиг бараан болур деп шиитпирни үндүрген кижилер биске кажан кезээде турган. Ону камгалаар, сайзырадыр дээш. Силер болгаш Петербургка душканым кижилер база ындыг кижилерниң санынга хамааржыр силер, Россия кезээде ындыглар-биле чоргаарланыр. Чонда нептереңгей чугаада дег, чурт ындыг кижилерге туттунуп турар. Кандыг-даа адырга. Бо таварылгада – шериг херээнге” — деп, Президент айыткан.
Ук президент программазын бо чылын Владимир Путинниң даалгазы ёзугаар ажылдадып киирген болгаш бо хүннерде чедиишкинниг боттанып турар. Ооң кол сорулгазы болза, Украинага шериг операциязының киржикчилериниң санындан муниципалдыг болгаш күрүне эргелеп-башкарылгазының органнарынга ажылдаар удуртукчуларны белеткээри болур. Шилилге соонда баштайгы агымче бүгү Россияның булуңнарындан 83 шериг албанныг кирген. Олар Россияның улус ажыл-агыйының болгаш күрүне албанының академиязының күрүне эргелеп-башкарылгазының дээди школазының «Сенеж» мастерскаязының чанында өөренип турарлар.
Тывадан бирги агымга баштайгы шенелделерни дөрт шериг албанныг эрткен. “Маадырларның үези” деп президент программазының организакчыларының дыңнадып турары-биле алырга, шериг албанныгларның шилилгези моон-даа соңгаар уламчылаар.
А. ХЕРТЕК белеткээн
“Шын” № 45 2024 чылдың июнь 19
