Чеди-Хөл кожууннуң Сайлыг сумузунга тускай шериг операциязынга киржип тургаш, маадырлыы-биле чок болган Эдуард Ооржактың чырык адынга тураскааткан бут бөмбүүнге кожуун чергелиг маргылдаа бо чылын ийи дугаар болуп эрткен.
Хемчегни Эдуард Ооржактың чоок кижилери, төрелдери организастап эрттирген. Маргылдааның байырлыг ажыдыышкынынга «Ада-чурт камгалакчылары» күрүне фондузунуң төлээлери сөс алгаш, чылыг-чымчак сөстерни чугаалап, спортчуларны хей-аът киирген.
Эдуард Ооржак бут бөмбүү ойнаарынга ынак чораан. Ынчангаш ооң чоок кижилери спортчу оюннуң бо хевирин шилээш, маргылдааны эрттиргени ол.
Эдуард Ооржак 55-ки мото-адыгжы (даг) бригаданың шеригжизи чораан. Сирияга болгаш Украинага болган тускай шериг операцияларының киржикчизи. «Эрес-дидим чоруу дээш», «Дайынчы шылгаралы дээш» деп хөрек демдектериниң эдилекчизи.
ТМГ-ниң медээзинден.
«Шын» №37 2024 чылдың май 22
