Куулар ЧЕРЛИГ-ООЛ, Тываның улустуң чогаалчызы
МААДЫРНЫҢ ПАРТАЗЫ (баллада)
1.
Эге класс чажындан-на
Эштеринге эргеленчиг.
Эртем-номга сонуургалы
Эмин эрттир төлүм чүве.
Хайлыг дайын оглумну чоп
Хайыра чок кара черже
Октапканыл? О, бурган…
Ооң орган партазын... ой та…
2.
Каш хондур караам суун төп,
Качыгдалга алзы бердим.
«Авай! Авай! Орталан» – деп,
Ажы-төлүм ыглап-сыктаан…
Ие нүүрүм ам-на миннип,
Ишти-баарым орталанып,
Уруг-дарыым ачазының
Угаадыынга ужур билдим.
3.
– «Маадырның партазын»
Барып көөлү, угбай – деп,
Башкы уруг чедип келгеш,
Школаже мени чалаан.
Школаже чорупкан бис.
Улус ында чыглып келген.
Үе-шагның судал согуун
Үрер хөгжүм дамчыдып тур.
4.
«Полктуң оглун» сактып,
Бодум быжыг туттунуптум.
Оглум орган партазынга
Оожум ээгип мөгейдим.
Ооң караа сагыжымга
Хүлүмзүрүп хүнче көрдү.
О, богда, ылап маадыр
Күштүг оолдуң авазы мен!
Чон ынчаар адап каанда,
Чоп кончуг муңгараар мен.
Човулаңны чоргааралым
Чоорту өжүр базып кааптар.
5.
Эртем-номче чүткүл-соруу
Эң-не быжыг эрес төлдүң
Адын улам бедик тудуп,
Маадырның партазынга
Бадыткаарын күзээр-дир мен!
27 – 30.11.2022.