Совет Эвилелиниң үезинде, 1958 чылда, Кызыгааржының хүнүн май 28-те демдеглээр дугайында доктаалды ССРЭ-ниң сайыттар Чөвүлели хүлээп алган. А Россияга ук байырлалды 1994 чылдан тура албан ёзузу-биле ол-ла хүн май 28-те демдеглээр дугайында чарлыкка Россияның Прездентизи атты салган.
Оон бээр-ле май 28-те Кызыгааржының хүнүн Россияга демдеглээри чаңчыл болу берген. Бөгүн Кызыл хоорайга Тиилелге шөлүнге байырлыг чыскаалга кызыгааржылар, шериг албанныглар, хоочуннар, профильдиг класстар өөреникчилери, найысылалдың чурттакчылары болгаш аалчылары «Шупту салгалдарның кызыгааржыларынга» тураскаалынга боодал чечектерни салып, албан-хүлээлгезин күүседип тура, амы-тынындан чарылган ажылдакчыларга тураскаадып, сактыышкын ёзулалын эрттирген.
Бистиң корр.
