Бо айның эгезинде төрүттүнген кижилер ылап-ла Бугалар: өжеш, дедир, ындыг-даа бол уян болгаш хомудаачал. Айның төнчүзүнде төрүттүнгеннер ёзулуг Ийистер — шимченгир, сергек, каткыжы, окпан-чикпен болгаш бузурукчу чаңныг.
Ынчалза-даа майның ортаа үези — 17-ден 23-ке чедир төрүттүнген улус оларга дөмейлешпес. Олар бот-боттарынга дөмейлешпес ийи аңгы зодиактың онзагай талаларын алган. Чижээлээрге, Буганың ажылгыр-кежээзи биле Ийистерниң чугаакыры каттышкаш, кандыг-даа коллективке чедиишкиннерлиг кижи болур. Ийистерниң хөглүг чаңы биле Бугаларның шыдамык чоруу, бо ортаа үениң кижилеринге, эң-не эки ада-ие болурун чедирер. Майның ортузунда төрүттүнгеннер болганчок-ла дыштанып билбестер, хары угда дыка хөй ажылды чүдүрнүп алгаш, төнчүзүнде чилчии үстүр.
Карак кызыл, чайгылыш чок, ажыл-ишчи, идегелдиг болгаш доктаамал Бугалар май айның эгезинде төрүттүнер. Ол үеде төрүттүнген кижилерге чуртталганың материалдыг талазы — таарымчалыг, эптиг, ажыктыг чүүлдер, даартагы хүн дээш бүзүрелдиг чуртталга оларга эң-не кол. Ындыг кижилер черле идегелдиг, шыдамык, далаш чок болур.
Айның төнчүзүнде Ийистерниң үези келир. Олар чугаакыр, сонуургак, угаангыр, өөрениичел. Ол ышкаш хосталгага ынак, хөй талалыг сонуургалдарлыг, чаңгыс үеде хөйнү кылып шыдаптар, аңгы-аңгы кижилер-биле чугаалажып билир боор.
«Шын» №18 2025 чылдың май 15