Таңды кожуунда «Металлург» кадыкшылга лагериниң баазазында майгыннарлыг лагерьниң бирги ээлчээ ажылын эгелээн. Аңаа дыштаныры-биле, республиканың бүгү кожууннарындан 20 ажыг уруг келген.
Тываның Өөредилге яамызының демдеглеп турары-биле, майгыннарлыг лагерьде эко-туризмге хамаарышкан дыштанылгалыг болгаш өөредилгелиг хемчеглер көрдүнген. Бо ээлчегниң онзагайы – чалыы спортчуларның күш-шыдалын болгаш техниктиг арга-мергежилдерин сайзырадырынче угланган тускай белеткелдиг программаны ажылдап кылганы. Ол өөредилгелерге бедик арга-мергежилдиг тренерлерни киириштирген.
Ниитизи-биле Тывада бо чайын майгыннарлыг 4 лагерь ажылдап турар: «Металлургтан» аңгыда, Улуг-Хем кожууннуң «Чодураа» лагеринде, ол ышкаш Тожу болгаш Бай-Тайга кожууннарда.
ТР-ниң өөредилге сайыдының хүлээлгезин түр үеде күүседип турар Ренат Ооржактың чугаазы-биле алырга, ук лагерьлерниң инфраструктуразы бүрүнү-биле майгыннарлыг лагерьлерге база таарымчалыг. Кол лагерьниң чаңгыс ээлчээниң дургузунда майгыннарлыг лагерьге чеди-чеди хонуктуг 3 ээлчегни эрттирип болур. Чижээлээрге, «Металлургтуң» майгыннарлыг лагеринге элээди мөгелер ийи ээлчегге тренировкалап болур. Оларның спортчу чыыштарынга дыка таарымчалыг чер болуп турар.
Чайгы кадыкшылга кампаниязы июнь 1-ден эгелээн дээрзин сагындыраал. Тывада ниитизи-биле 22 стационар, 4 майгыннарлыг база 146 хүндүскү лагерьлерни организастаан. Чай дургузунда ниитизи-биле 7-ден 17 хар чедир назылыг 18 ажыг муң уругну хаара тудар.
«Металлург» лагерь Чеди-Хөл кожуунга хамааржыр. Баштай ол Аржаан деп черге турган, 1972 чылда ону Чагытай хөлдүң эриинче көжүрер деп шиитпирни үндүрген. «Металлург» 50 ажыг чыл дургузунда Чеди-Хөл кожууннуң база бүгү Тываның уругларын хүлээп турар.
А. СОЯН белеткээн.
Чурукту интернеттен хоолгалаан.
“Шын” №27 2025 чылдың июль 17