Бөгүн Тывада Майның бирин - Частың болгаш күш-ажылдың хүнүн байырлап турар. Байырлал хүнү-биле Тываның Баштыңы республиканың ажыл-ишчилеринге байыр чедирген.
«Бөгүн шупту чоннуң ынак байырлалында республиканың болгаш чурттуң чаагай чоруу дээш ажылдап турар бүгү чонга өөрүп четтиргенимни илередир-дир мен. Тываның чедиишкиннери болгаш чоргаарланыр чүүлдери дээрге-ле, ооң муң-муң чурттакчы чонунуң күш-ажылының түңнелдери-дир.
Бо чылын келир үеде кым болурун шилип алыр ужурлуг аныяктарга болгаш элээдилерге онзагай кичээнгейни салып турар бис. Оларга ажылчын мергежилдер фестивалынга делгелгелер, мастер-класстар, мергежилдер марафонун эрттирер. «Россияда ажыл» кадрлар төвүнүң хостуг олуттар ярмарказындан ажыл дилеп турар аныяктар хостуг ажыл олуттарын сонуургап болур.
Бо хүннерде республиканың көдээ ажыл-агый адыры идепкейлиг ажылдап кирипкен. Эрткен неделяда часкы хову ажылдарының стартын чарлаан бис. Арат-фермерлерниң часкы тарылга ажылдарын хынаар дуржулгалыг агрономнар комиссиязын тургузарын дааскан мен. Шупту адырның ажыл-агыйларының ажыл-ишчилерин Частың болгаш күш-ажылдың байырлалы-биле байыр чедирип тур мен! Майның бири-биле, чаңгыс чер чурттугларым!» — деп, Тываның Баштыңы бодунуң блогунга бижээн.
Россия Федерациязының Хамаарышпас профэвилелдер федерациязының саналдааны-биле алырга, Тыва өске регионнар ышкаш, Май 1-де күш-ажылчы коллективтерниң калбак чыскаалындан ойталаанын сагындыраал.
Бөгүн чаңчыл болу берген чыскаалдың орнунга ажылчын кижиниң овур-хевирин нептередиринче угланган чымыштыг программа республиканың чурттакчыларын манап турар.
