2023–2024 өөредилге чылы доозулган. Бо өөредилге чылында Тываның аңгы-аңгы школаларының 76 доозукчузу алдын, 58 өөреникчи мөңгүн медаль-биле школаны дооскан.
Таптыг-ла он чыл бурунгаар мөңгүн медаль-биле эки өөренир доозукчуларны шаңнаар чаңчылды соксаткан турган. Бо өөредилге чылында Россияга эрги чаңчылды катап эгиткен. Ийи «4» деп демдектиг, арткан эртемнерде шупту «5» демдектерлиг оолдар, уруглар мөңгүн медаль-биле шаңнадыр эргелиг.
ТР-ниң Баштыңы Владислав Ховалыг школаны тергиин өөредилгелиг, алдын болгаш мөңгүн медаль-биле дооскан уруглар-биле ужуражып, ажык чугааны кылган.
Тываның Баштыңы регионалдыг Чазактың командазы амгы үеде кандыг төлевилелдер-биле ажылдап турарын, шиитпирлээр болгаш ам-даа хөгжүдер нарын болгаш кедилиг угланыышкыннар дугайында илеткелди кылган. Республиканың бурунгаар хөгжүлдезинге адыр бүрүзүнге кадрларның кайы хире чедишпезин ол сагындырып чугаалаан.
«Школаның тергиин доозукчулары, силерге улуг идегелдиг бис. Силерниң-биле кады төрээн чуртувусту сайзырадыр бис. Силер эвес болзуңарза, ол планнарны кым боттандырарыл? Бедик күш-ажылчы түңнелдерже угланган кызымаккай өөредилгеңер-биле ону бадыткаан силер, шупту чүве болу бээринге бүзүрээр мен» – деп, ТР-ниң Баштыңы чугаалааш, «Силерниң школаны медаль-биле дооскан талантыңар болгаш тура-сорууңар, бир дугаарында, төрээн Тываңарга албан херек» — деп сагындырган.
ТР-ниң өөредилге сайыды Елена Хардикова бо өөредилге чылының доозукчулары техниктиг эртемнер – физика, информатика, профильдиг математика, химия эртемнеринге эки демдектерни алган дээрзин демдеглээн.
Кызылдың Президентиниң кадет училищезиниң доозукчузу Арыя Хоюр-оол ийи эртемни 100 баллга дужааган. Үш дугаарында орус дыл эртемин 100 четпес дээрден башка база кончуг «эки» 97 балл алган. Доозукчуларның өмүнээзинден Арыя сөс алгаш, ада-иезинге болгаш башкыларга өөрүп четтиргенин илереткен.
Тергиин өөредилгелиг доозукчулар-биле ужуражылгага аңгы-аңгы адырларның сайыттары болгаш депутаттар база киришкен. Регионнуң удуртукчузунуң илеткелиниң соонда уруглар ажык чугаага киржип, кадык камгалалы, арыг агаар дугайында база Моол күрүне-биле харылзаага хамаарышкан айтырыгларны салган. Моон алгаш көөрге, оолдар, уруглар төрээн чериниң салым-чолу дээш сагышсырап, ооң сайзыралынга үлүг-хуузун киирер дээрзинге идегел улуг.
Таңды, Улуг-Хем, Тес-Хем, Чөөн-Хемчик, Өвүр, Бии-Хем, Чеди-Хөл, Чаа-Хөл, Эрзин, Каа-Хем, Барыын-Хемчик, Сүт-Хөл, Бай-Тайга, Тере-Хөл кожууннарның болгаш Ак-Довурак, Кызыл хоорайның доозукчулары школаны алдын медальдар-биле дооскан. Чаңгыс аай күрүне шылгалдазын эвээш комплектилиг школаларның доозукчулары эки үре-түңнелдиг дужааганын демдеглээри чугула.
Сүт-Хөл кожууннуң Чимит-Доржу Баирович Ондар аттыг Кызыл-Тайга ортумак школазының доозукчузу Ачыты Сарыглар:
– Бүдүн чыл дургузунда шылгалдага белеткенип, номчуттунуп турдум. Дараазында доозукчуларга чагыым болза, хүннүң-не белеткенир. Башкыларының, ада-иезиниң чугаазын дыңнап, оларның деткимчезин, сүмезин хүлээр. Мен ынчаар кылгаш, алдын медаль алганым ол. Ада-иемге, башкыларымга өөрүп четтиргенимни илередир-дир мен. Томск хоорайның күрүне университединиң психология салбырынче кирер деп планнап турар мен. Клиниктиг психолог болур күзелдиг мен.
Медаль алган доозукчуларга ТР-ниң Дээди Хуралының депутады, «Чаңгыс демниг Россия» партиязының кежигүнү Аяна Моңгуш база байыр чедирген.
«Тергиин демдекке өөренгеш, медаль ап турар доозукчуларның саны чылдан чылче көвүдеп турары өөрүнчүг-дүр. Оларның чедиишкини дуржулгалыг башкыларның, мерген угаанныг дагдыныкчыларның деткимчези чокка болдунмас. Ынчангаш башкылары база бөгүн байырлап, өөрүп, өөреникчилеринге чоргаарланып турар. Олар база макталга төлептиг» – деп, Аяна Моңгуш демдеглээн.
Айдың ОНДАР.
Чуруктарны интернет четкизинден алган.
"Шын" №52 2024 чылдың июль 13
