Тыва Республиканың Чазак Даргазының оралакчызы Алик Монгуштуң удуртулгазы-биле ажылчын бөлүк Кызыл кожуунче мал тарылгазы база малдың демдектээр ажылын чорудары-биле четкен.
Көдээ ажыл-агый болгаш аъш-чем яамызының ажылдакчылары, мал эмчилери болгаш кожууннуң көдээ ажыл-агый килдизиниң ажылдакчылары-биле Кызыл кожууннуң Ээрбек сумузунуң малчыннары Дүрген-оол, Саяна Канданнарның аалынга чедип, малдың тарылгазы, ханын алыры база демдектээр ажылды чоруткан.
Малдың тарылгазын чараалаар аарыг (ящур), сибирь язвазынга удур чорудуп турар. Амгы үеде республикада 66 386 бода мал, 182 340 шээр мал болгаш 12 289 аът тарылганы алган.
Россияның Федералдыг ветеринарлыг мал-маган хайгаараар албан чериниң тускай тургускан программазы (ФГИС «Хорриот») ёзугаар мал-маганны демдектээр, даңзылап, чизелээр ажыл республиканың девискээринде чоруттунуп турар. Амгы үеде ФГИС «Хорриотта» чизелеттинген мал бажы: 287 аът, 5841 бода мал, 47 сарлык, 8 сыын, 7 теве, 3381 шээр мал.
Республиканың ниити мал тарылгазын болгаш малдың демдектээрин мал эмчилери март айдан тура кожуун бүрүзүнде эгелей берген. Мал демдектээшкинин болгаш мал тарылгазын сентябрь айның төнчүзүнге чедир доозары көрдүнген.
ТР-ниң Көдээ ажыл-агый яамызының медээлеринден.
«Шын» №28 2024 чылдың апрель 13
