Кызыл хоорайның Ленин кудумчузунуң 24 дугаар бажыңының ханазында ССРЭ-ниң кадык камгалалының тергиини, Тыва Республиканың кадык камгалалының алдарлыг ажылдакчызы Маны Оюновна Ооржакка тураскааткан самбыраны апрель 15-те ажыткан.
Найысылал Кызылдың төвүнде ол бажыңга хоорайның 20 дугаар аптеказы турган. Аңаа Маны Оюновна хүндүлүг дыштанылгаже үнгүжеге, 30 ажыг чыл ооң удуртукчузу болуп ажылдаан.
Маны Ооржак 1939 чылдың апрель 15-те төрүттүнген. 1956 чылда Кызылдың 2 дугаар школазын дооскаш, Иркутскунуң медицина институдунуң фармацевтика факультединге провизор тускай эртемни чедип алган. Ол Тываның аптека ажылдакчыларының аразында баштайгы дээди профессионал эртем чедип алганнарның бирээзи.
Бодунуң күш-ажылчы базымнарын 1961 чылда Самагалдайның аптеказындан эгелээш, Тываның аптека системазынга 50 ажыг чыл ажылдаан.
Сөөлгү ажылдаан че- ри – Кызылдың 20 дугаар аптеказы. 1990 чылдарда республиканың болгаш хоорайның аптека коллективтери рынок экономиказынче шилчилгениң берге үелериниң шылгалдазын эрткен. Эм-таң хандырылгазын бодал чок эде тургусканының соонда, республиканың аптекаларының хөй кезии буурап дүшкен турган. Маны Оюновнаның удуртканы 20 дугаар аптека, ооң билдилиг удуртулгазының ачызында, берге үелерни улуг чидириг чок эрткен болгаш чүгле хоорайның эвес, а бүгү республиканың чурттакчы чонун эм-таң-биле хандырып, чоннуң кадыын камгалаарынга улуг үлүүн киирген. Коллегалары ооң ак-сеткилдиин, ханы билиглиин, мергежилинге, ажылынга бүрүнү-биле бердингенин, кижилерге биче сеткилдиин, эриг баарлыг сагыш човаачалын, шыдамыын үнелээрлер.
Ол дугайында тураскаалдыг самбыраны ажыдар байырлыг ёзулалга киришкен чон сактып чугаалап турган.
Маны Оюновна Ооржакка тураскааткан самбыраны ажыдар дугайында шиитпирни Кызыл хоорайның Төлээлекчилер хуралы хүлээп алган. Ол дугайында доктаалды Кызыл хоорайның баштыңының оралакчызы Аяс Лопсан чыылган чонга таныштырган.
М.О. Ооржактың төрүттүнген хүнүнде аңаа тураскааткан самбыраны ажыдып турарынга, хоорай хуралынга болгаш чагыргазынга, тураскаалдыг самбыраның байырлыг ажыдыышкынынга келген чонга Маны Оюновнаның өөнүң ээзи, Кызыл хоорайның хүндүлүг хамаатызы, шылгараңгай күрүне ажылдакчызы Дандар-оол Көк-Хунаевич Ооржак өөрүп четтиргенин илереткен.
/ Мерген КЫРГЫС.
Авторнуң тырттырган чуруу.
"Шын" №29 2023 чылдың апрель 22
