Санкт-Петербург хоорайга «ARTIS» шаңналының 10 дугаар юбилейлиг байырлалы болуп эрткен. Аңаа Россияның 8 федералдыг округтарындан болгаш Белоруссиядан 3700 ажыг бичии артистер киришкен.
Россияның эстрада болгаш шоу-бизнестиң алдарлыг ажылдакчылары оларның аразындан эң-не дээрелерин дараазында номинациялар аайы-биле илереткен: “Хореография”, “Вокал”, “Инструменталдыг күүселде”, “Театр уран чүүлү”, “Чурулга уран чүүлү”.
2 сая рубль ажыг шаңнал фондузун үстүнде айыткан номинацияларның тиилекчилеринге үлештирген. ARTIS шаңналының номинантылары 2024 чылдың январь 1-ден 2025 чылдың август 31-ге чедир Бүгү-россия болгаш Делегей чергелиг фестиваль-мөөрейлерниң тиилекчилери, I чергениң Лауреаттары болган. Шак ындыг номинантылар Россияның 144 булуңундан болгаш Белоруссиядан ниитизи-биле 3700 киржикчи келген. Санкт-Петербург хоорайның аңгы-аңгы шөлчүгештеринге номинация аайы-биле болган мөөрейниң киржикчилериниң аразындан эң дээре коллективтерни болгаш оларның башкыларын, удуртукчуларын илереткен.
Тывадан аңаа киржип барган «Маны-Саа» чогаадыкчы студияның бичии киржикчилери аңгы-аңгы номинацияларга шаңналдыг черлерни ээлээн. Агата Ховалыг, Айнаш Ондар, Аделина Чимит-оол биле Каң-Болат Донгак “Соло дуэт” номинацияга сезоннуң эң дээре ыраажылары болган. Тываны төлээлеп барган үстүнде адаанывыс чогаадыкчы студияның башкылары Аржаана Доспан биле Камила Балдан дээрзин сагындыраал.
ARTIS шаңналының эксперттер чөвүлелинче – хореографтар Егор Дружинин биле Евгений Папунаишвили, театр болгаш кино артистери Светлана Камынина биле Михаил Тарабукин, ыраажылар Этери Бериашвили, Владимир Миллер болгаш өскелер-даа кирген.
ARTIS-2025 10 дугаар юбилейлиг шаңналын тыпсыр ёзулал декабрь 1-де “Октябрьский” Улуг концерт залынга байырлыг шоу-программа хевирге эрткен.
Медээни болгаш чурукту ТР-ниң Культура яамызындан алган.
“Шын” №49 2025 чылдың декабрь 18
