Бии-Хем кожууннуң Туран хоорайының чурттакчызы Марфа Тихоновна Скубко 1925 чылдың февраль 10-да Башкортостан Республиканың Уфинск районунуң Белебей хоорайынга 9 ажы-төлдүг өг-бүлеге төрүттүнген.
Ол бодунуң аныяк үелерин өскен-төрээн чурту – Башкортостанга эрттирген. Ажыл-агыйжы намдарын Иманск заводтуң станогундан эгелээн. Оон демир-орук механигинге, хөмүр-даш уургайынга ажылдаан.
Салым-чолдуң аайы-биле 1972 чылда Тывага чедип келген. Ол уруглар садынга хөй чылдарда нянялап ажылдаан. Хөй чылдарда үре-түңнелдиг ажылы дээш “Күш-ажылдың хоочуну” атты алган.
Бии-Хем кожууннуң эң улуг назылыг хүндүлүг хоочуну 100 харлап турар-даа болза, чарт угаанныг, карааның көөрү безин тулган! Хүндүлүг кырган-ава үш ажыл-төлдү кижизидип өстүрген. Ооң кол байлаа – 9 уйнуу болгаш 12 уйнуктарының уруглары.
Ол кажан-даа эмнер ишпес, хан базыышкынының дугайында чүгле 70 харлап чорааш билип алган. Телевизор көрбес, каракка хоралыг дээр. Ол карак-шили чокка 99 харлыынга чедир боду номчуур турган.
Хүндүлүг кырган-аваның 100 харлаан чараш хүнүнде ооң чоок улузу болгаш ТР-ниң Дээди Хуралының депутады Аяна Монгуш чедип, байыр чедирген.
Бистиң корр.
Чуруктарны интернеттен хоолгалаан.
“Шын” №5 2025 чылдың февраль 13
