Волейбол. "Сүбедей" спорт ордузунга сентябрь 19–22 хүннеринде 16 харга чедир оолдар, уруглар аразынга республиканың бирги чери дээш волейбол маргылдаазы болуп эрткен. Маргылдааның кол-ла сорулгазы школачылар аразынга волейболду хөгжүдери база бедик деңнелдиг командаларны белеткеп, Сибирь девискээринге шаңналдыг черни алыры болуп турар. Ындыг чедиишкинни чедип алыр аргалар бистиң оолдар, уругларда бар деп, "Сүбедей" спорт школазының тренер башкызы Тараа Хомушку чугаалады. Шыырак оолдар, уругларны үргүлчү өске девискээрлерниң командалары-биле арга-дуржулга солчуп, мергежилин эки бедик деңнелге чедирип, иштики сагыш-сеткилин быжыктырып, бүзүрелин көдүрери болур.
Дөрт хонук иштинде үргүлчүлээн маргылдааның түңнелинде шаңналдыг черлерже дараазында командалар кирген. Оолдар аразынга 1-ги черни – Каа-Хем кожуун, 2-ги черде – Бай-Тайга кожуун, 3-кү черде – Таңды кожуун, 4-кү черде – Кызыл кожуун. Уруглар аразынга 1-ги черни – Улуг-Хем кожуун, 2-ги черде – Бай-Тайга кожуун, 3-кү черде – Ак-Довурак хоорай, 4-кү черде – Каа-Хем кожуун. Тиилекчилер база шаңналдыг черже кирген командалар, кубок, медаль, диплом, акша шаңналдарынга төлептиг болганнар.
Уруглар хүрежи Москвага сентябрь 21–22-де "Измайлово" СК-га 24 харга чедир уруглар аразынга Россияның бирги чери дээш херээжен улус аразынга хүреш маргылдаазы болуп эрткен.
Аңаа бистиң республикадан Киш-Кулаа Кыргыс 57 килге (тренер башкызы Айдың Достай) эки хүрешкеш, 3-кү черни ап, Россияның командазының кежигүнү болуп, өске чурттарга делегей чергелиг маргылдааларга киржир эргени чаалап алган.
Хостуг хүреш. Белоруссияның төвү Минск хоорайга сентябрь 20–21 хүннеринде Олимпий оюннарының 3 дакпыр чемпиону Александр Медведьке тураскааткан 53 дугаар делегей чергелиг маргылдаа болуп эрткен.
Аңаа бистиң республикадан делегей чергелиг спорт мастерлери Начын Монгуш (тренери Алибек Хомушку) удурланыкчыларындан бедик белеткели-биле ылгалып, чараш хүрешти көргүзүп, бирги черни алган.
Дараазында 70 килдиг мөгелер аразынга делегей чергелиг спорт мастери Сайын Казырык (тренери Буян Бурбучук) Россияның бо чылгы чемпиону Иналбек Шериев-биле эки хүрежип, чүгле сан талазы 7:4-ке ойнаткаш, 3-кү черге төлептиг болган. Амгы үеде мөгелер Россияның командазы-биле Сочиде белеткел чадазын эртип турарлар.
Улан-Удэ хоорайга сентябрь 21–22 хүннеринде 21 харга чедир аныяктар аразынга делегей чемпиону Борис Будаевке тураскааткан делегей чергелиг хостуг хүреш маргылдаазы Казахстан, Киргизия, Моолдуң база Россияның мөгелериниң аразынга күштүглерни илередири-биле, бедик байдалга болуп эрткен. Бистиң республикадан 8 мөге, тренер башкы, делегей чергелиг спорт мастери Аян-оол Ондарның удуртулгазы-биле эки киришкеннер. Ол ышкаш маргылдааның хүндүлүг аалчызы болуп делегей чергелиг спорт мастери Радислав Наважап чораан. Тренер башкы Аян-оол Ондарның медээзи-биле алырга, бистиң 7 оол 3 дугаар чер дээш ачыр-дачыр хүрешкеннер, түңнелинде, чүгле 65 килге Арсен Доржу 3-кү черни, 70 килге Кежик Ооржак база 3-кү черни, эң аар 125 килге Эртине Түлүш 1 дугаар чер дээш хүрешке сан талазы-биле бурят мөгеге ойнаткаш, 2 дугаар черге төлептиг болган. Аныяк мөгелерге боттарының кошкак талаларын эки белеткээш, хей-аъдын бедик туткаш, дараазында маргылдааларга чүгле бедик бир дугаар черни алырын күзедивис.
Сумо. Японияда Тыва мөгевис Даваа Амыр-Санаа (мөге ады Роуга) бо удаа тиилелгези көвей “Катикоси” кылдыр 8:7 кылдыр сентябрьның Император Кубогун дооскан.Үлегерлиг мөгевиске, эки белеткелди, ам-даа чедиишкиннерни күзедивис.
Алексей ЧАМБАЛ-ООЛ.
Чуруктарны интернеттен алган.
“Шын” №74 2024 чылдың сентябрь 28