Кижи амытан иезиниң иштинге боттанып келгеш-ле, чуртталгазының төнчүзүнге чедир эмчиниң дузазын ап кээр. Чаш уругга-даа, назылап улгаткан кырганга-даа, аныяк-чалыы оолдар-кыстарга-даа эмчиниң дузазы кандыг-даа үеде хереглеттине бээр.
Миннип кээримге-ле, чайның башкы айының ортан үезинде, кончуг изиг үеде, Эмчилер хүнү деп байырлалды демдеглээр чүве. Медицина адыры – хөй талалыг, кончуг улуг адыр. Июнь 16-ны Медицина ажылдакчыларының хүнү. Медицина ажылдакчызының хүнү чолаачы, санитарка, эмчи, медицина сестразы дээш кадык камгалалында ажылдап чоруур кижи бүрүзүнүң байырлалы.
Кызылдың Улусчу чогаадылга бажыңынга Медицина ажылдакчызының хүнүнге тураскааткан байырлыг хурал болган. Аңаа ТР-ниң Чазааның Даргазының оралакчызы Орлан Сарыглар, ТР-ниң Дээди Хуралының депутады Долаан Калбак, ТР-ниң кадык камгалал сайыды Анатолий Югай, ТР-ниң Медицина палатазының даргазы Анжела Канчыыр-оол болгаш республика девискээринде кадык камгалал шугумунда ажылдап чоруур эмчилер, эмчи сестралары, санитаркалар, чолаачылар, лаборантылар дээш өскелер-даа көрүкчүлер залын долдур чыглып келген.
ТР-ниң Чазааның Даргазының оралакчызы Орлан Сарыглар Тываның Баштыңының өмүнээзинден байыр чедиргеш, күрүне шаңналдарын тывыскан.
«Төрээн черивистиң келир үезинге, сайзыралынга чурттакчы чоннуң кадык амыдыралы чугула черни ээлеп турар. Ынчангаш 2024 чылды Кадыкшыл чылы кылдыр Владислав Товарищтайович анаа эвес чарлаан. Профессионал байырлалыңар таварыштыр байыр чедирип тур бис. Тыва нацияны камгалап арттырарынга силерниң үлүг-хууңар кончуг улуг. Эмчилер хүнүнде дайынчы хөделиишкиннер девискээринде идепкейжи ажылдап чоруур эмчилерни база демдеглээри чугула. Олар, ок-боо туткаш, төрээн чуртун камгалап чоруур дайынчылар дег, дүн-хүн чокка кижилерниң кадыкшылы дээш демисежип чоруур» – деп, Орлан Сарыглар чугаалады.
ТР-ниң Перинаталдыг төвүнүң бичии уруглар эмчизи Шораана Бокаштай, ТР-ниң 1 дугаар эмнелгезиниң нейрохирургия салбырының нейрохирургу Римма Күдерек, Бичии уругларның консультация-диагностиктиг төвүнүң эмчизи Надежда Салчак, ТР-ниң бичии уруглар эмнелгезиниң эмчизи Лада Шаравии, Улуг-Хем кожууннуң төп эмнелгезиниң фтизиатр эмчизи Анастасия Шангыш-оол олар «Тыва Республиканың алдарлыг эмчизи» деп бедик атты алганнар.
Эрзин кожууннуң төп эмнелгезиниң бичии уруглар эмчизи Алдын-кыс Дүвенге, ол-ла эмнелгениң ниити аарыглар эмчизи Чечек Ламажап оларга «Кадык камгалалының алдарлыг ажылдакчызы» деп бедик атты тывыскан.
Улуг-Хем кожууннуң төп эмнелгезиниң улуг эмчизиниң оралакчызы Владимир Данжаловка, ол-ла кожууннуң төп эмнелгезиниң диш эмчизи Августа Сарыг-оолга «Тыва Республиканың алдарлыг эмчизи» деп атты тывыскан.
Дараазында ТР-ниң Дээди Хуралдың депутады Долаан Калбак сөс алгаш, Федералдыг Хуралдың болгаш ТР-ниң Дээди Хуралының өмүнээзинден өөрүп четтириишкиннерни, хүндүлел бижиктерни эмчи шугумунуң шылгараңгай ажылдакчыларынга тывыскан.
ТР-ниң кадык камгалал сайыды Анатолий Югай көрүкчүлер залын долдур чыглып келген коллегаларынга Медицина ажылдакчызының хүнүн таварыштыр байыр чедиргеш, ук адырда сеткилиниң ханызындан ажылдап, бүгү чуртталгазын чонунуң кадыкшылынга өргүп чоруур коллегаларынга шаңналдарны тывыскан.
Айдың ОНДАР.
Чуруктарны интернеттен алган
“Шын” №44 2024 чылдың июнь 15
