Тываның социал четкилер болгаш мессенджерлер шөлдеринде “Тыва Республиканың черлерин, хөлдерин садар” дээн дугайында шынга дүүшпес медээни дыңнадып, билдириишкинге аттар салырын кыйгырган бижикти калбаа-биле тарадып турар. Албан ёзузу-биле үнген медээде участоктарны садар азы хөлезиге бээр дугайында чүнү-даа дыңнатпаан хирезинде, кыйгырыг бижиктиң автору медээниң үнген дөзү ол деп айыткан.
Дус-Хөлдүң чоогунда бойдус ажыглалдыг черлерни даштыкы инвесторларга садар деп турарының дугайында медээ МЕГЕ дээрзин, Тываның Арга-арыг болгаш бойдус ажыглалының яамызы албан езузу-биле дыңнадып тур! Республика өнчүзү болур хөлдүң чер участоктарын хөлезиге бээриниң дугайында чугаа шуут турбаан.
«Федералдыг хоойлужудулгада айыттынганы ёзугаар, суг объектилери – хемнер, хөлдер, аржааннар болгаш өске-даа кара суглар күрүне өнчүзүнге хамааржыр болгаш оларны хуу өнчүже дамчыдары хоруглуг. Чурттакчы чоннуң суг объектилеринче баар оруктары, кокпалары ажык болгаш хостуг болур ужурлуг – деп, Тываның арга-арыг болгаш бойдус ажыглалының сайыды Григорий Ондар тайылбырлаан. – Бо таварылгада, Дус-Хөлдүң чоогунда чер участоктарын чүгле хөлезиге ап болур. Хөлдүң эриинде туттунган пансионаттарның ээлери Таңды кожууннуң Межегей суму чагыргазының бодундан чер участоктарын чүгле хөлезиге алганнар. Тус черниң чурттакчызы, кожа регионнуң азы даштыкы чурттуң төлээзи дээш, кандыг-даа инвестор республиканың туризм адырынга боттандырып болур төлевилелдерни сонуургап, Тываның девискээринде кандыг-даа төлевилелче инвестиция акшазын салыр-даа болза, байдал өскерилбес – бойдус ажыглалының объектилери күрүне өнчүзү бооп артар, а оларның ажыглалында суг объектилери болгаш чер участоктары республиканың өнчүзү бооп хевээр артар».
Тываның Арга-арыг ажыл-агый болгаш бойдус ажыглалының яамызының медээзинден.