ТУСКАЙ ШЕРИГ ОПЕРАЦИЯЗЫНДА КИРЖИП ТУРАР ЧАҢГЫС ЧЕР ЧУРТТУГЛАРЫВЫСКА ГУМАНИТАРЛЫГ ДУЗА ЧЫЫР АЖЫЛДАР АМ-ДАА УЛАМЧЫЛАП ТУРАР.
ТР-ниң Дээди Хуралының депутаттары квадрокоптер, ТР-ниң Чурагайлыг хөгжүлде яамызы ноутбук, хууда сайгарлыкчы Ирина Лифанова 2 рацияны июль 12-де Улусчу фронтунуң штавынга эккеп хүлээткен. Оон аңгыда, Тываның Улусчу полк хөй-ниити оранизацияның кожууннарда волонтерлары хол-биле өрээн дайынчы автомашиналар шывар четкилерни база эккелген.
Хайыракан, Арыскан, Владимировка сумуларының волонтёрлары автомашина шывар болгаш дайынчыларның шыптыныптар четкилерин даарап эккелген. Автомашина шывар четкиниң узуну – 6, дооразы – 3 метр. Ниитизи-биле 18 дөрбелчин метр болур дээрзин сагындыраал.
Улусчу фронтунуң Тыва Республикада даргазының дузалакчызы, "Чаңгыс демниг Россия" партиязының кежигүнү Аяс Монге:
– Бо айның 20-ден бээр ТШО-да дайынчыларывысче 20 тонна чүък чүдүрер автомашинага ийи чиик автомашинаны, 3 мотоциклди болгаш бүгү республиканың чонунуң чыгган техниказын, шывыгларын чорудар деп планнап турар бис.
Июль 20-ге чедир ам-даа үе бар-дыр. Ынчангаш өске-даа чаңгыс чер чурттугларывысты тускай шериг операциязында киржип турар эрес-дидим дайынчыларывыска дуза кадарынче кыйгырып тур бис. Улусчу фронтунуң Кызыл хоорайда Тыва эки турачылар кудумчузунуң 3 дугаар бажыңында 1 дугаар каътта штавынга эккээрин кыйгырып тур бис. 2-10-50 дугаарлыг телефонче долгап болур.
Тускай шериг операциязында дайынчыларже гуманитарлыг дуза чедирер талазы-биле Тыва Россияда бирги черде чоруп турар. Ол дээрге чонувустуң чаңгыс аай демин көргүзүп турары ол. Ай санында гуманитарлыг дуза чедирер ажылдарга киржир күзелдиглерниң саны хүнден хүнче көвүдеп турары өөрүнчүг.
Кызыл хоорайның баштыңы Ирина Казанцева:
– ТР-ниң Дээди Хуралының депутаттары, «Чаңгыс демниг Россия» партиязының фракция кежигүннери тускай шериг операциязында киржип турар чаңгыс чер чурттугларывыска ай санында гуманитарлыг дуза кадар дугайында чаңгыс үн-биле шиитпирлээн турган бис. Ынчангаш 55-ки гвардейжи мото-адыгжы бригаданың болгаш 60 дугаар радио-локациялыг бригадаларның баштаар чери-биле харылзашкаш, оларның чугула хереглелдерин садып чорудуп турар бис.
Ай санында чыгган акшавыс 400 хире муң рубль болур. Бо удаада мотоциклди, рацияларны, квардокоптерни дээш оон-даа өске чугула херек херекселдерни садып эккелдивис. Тиилелгелиг ээп чанып кээрин күзедивис.
«Скорпион деп шола аттыг дайынчыга ийи рацияны дамчыдып тур бис. Дүрген каң кадык чанып кел, Скорпион!»– деп, Кызыл хоорайда хууда сайгарлыкчы Ирина Лифанова чугаалады.
«2022 чылда тускай шериг операциязы эгелээрге-ле, четкилерни аргып эгеледивис. 61 дугаар четкивисти эккелдивис. Улусчу фронтунуң-даа, бодувустуң-даа акша-төгериивис-биле материалдарны саткаш, күзелдиг авалар четкилерни даарап чорудуп турар бис. Оолдарывысты менди-чаагай чанып келзин деп йөрээвишаан, дааранып олурар бис» – деп, волонтёржу аваларның бирээзи чугаалады.
Айдың ОНДАР.
Авторнуң тырттырган чуруктары.
"Шын" №52 2024 чылдың июль 13
