Тывада назы четпээн уругларга профессия өөредир угланыышкынныг «Мергежил: Орук шимчээшкининиӊ аныяк инспектору» деп Бүгү-российжи төлевилелди эгелээн.
Ооӊ киржикчилери — школа назыны четпээн уруглар, өөреникчилер. Үш аӊгы бөлүктү, тодаргайлаарга, 5–9, 10–14 болгаш 15–17 харлыг уругларны, аӊгы-аӊгы мергежилдер-биле таныштырар. Орукка айыыл чок чорукту харыылаар, транспорттуг озал-ондактыӊ уржуктарын чайладырыныӊ дугайында теориялыг болгаш практиктиг кичээлдер болур.
Бир дугаар кичээлди Кызылдыӊ 5 дугаар «Рябинка» уруглар садында бичии чаштарга эрттирген. «Оруктуӊ айыыл чок чоруунуӊ үндезиннери» деп теманы олар аажок сонуургаан. «Орук, светофор, орук белдири» деп билиишкиннерни айтып берген, уруглар орук дүрүмүн ыяк сагыыр дээрзин билип алган.
Уругларныӊ айыыл чок чорукту сагып шыдаар, культурлуг болурунга, эрге-хоойлуну эки билиринге ажыктыг болур деп төлевилелдиӊ регионда координаторлары чугаалаан. Аныяк инспекторлар мергежилди өөренип алган соонда, билиин чедиишкинниг ажыглап болур. Төлевилел дооступ турда, идепкейлиг оолдар, уруглар «Орук шимчээшкининиӊ дүрүмнерин тергиин эки билир кижи» деп угаадыглыг оюнга киржир.
Ниити-российжи уругларныӊ болгаш чалыыларныӊ хөй-ниити организациязы, Россияныӊ Чырыдыышкын яамызы бо төлевилелче 45 регионну хаара туткан.
Тыва Республика оруктуӊ айыыл чок чоруун аныяк-өскенге суртаалдаар сорулга-биле идепкейлиг киржип турар.
Тываныӊ Өөредилге яамызыныӊ медээлеринден.
“Шын” №88 2024 чылдың ноябрь 16
