Чоокта чаа, ноябрь 9–11 хүннеринде, кожавыс Моолдуң Баян-Өлгий аймактың Цэнгэл сумунуң тургустунганындан бээр 33 чыл ою болгаш 12 чыл өөредилгелиг ниити билигниң 2 дугаарлыг тыва школазының чаа оран-савазының ажыдыышкыны байырлыг байдалга болуп эрткен.
Цэнгэл сумунуң тываларының, ада-иелерниң дилээн барымдаалап, ажы-төлүнге төрээн дылын, ёзу-чаңчылдарын кадагалап арттырар, өөредир сорулга-биле тус аймактың чагырга чериниң шиитпири-биле 1991 чылдың ноябрь 7-де Цэнгэл сумунуң тыва эге школазын ажыткан.
2019–2020 чылдарда ада-иелерниң дилээн өөренип көргеш, тыва өөреникчилерниң төрээн дылынга өөренир чогумчалыг байдалын тургузары-биле, Моолдуң Өөредилге болгаш эртем яамызының шиитпиринге даянып, тыва эге школаның тургузуунга катап чаа өскерилге кииргеш, 9 чыл өөредилгелиг ортумак школа кылдыр эде тургускан.
2023 чылдың июль 28-те Баян-Өлгий аймактың губернаторунуң дужаалы-биле 2024–2025 өөредилге чылындан эгелеп Цэнгэл сумунуң 12 чыл өөредилгелиг ниити билигниң 2 дугаарлыг школазы кылдыр тургускан. Бо хүнде ук школада 28 башкы, 40 ажылдакчы 320 ажыг тыва өөреникчини 17 аңгы класска хуваап, тыва дыл кырында өөредип турар. Ырак-узак көдээ малчын чоннуң ажы-төлү 112 өөреникчи школаның чаагайжыды туттунган 2 каът интернадында чурттавышаан, ук школада эртем-билиг чедип ап турар.
Моолдуң Өөредилге болгаш эртем яамызының чагыы-биле 2020 чылдың май айда школаның оран-савазының тудуун эгелээш, 360 олуттуг, амгы үениң негелдезинге дүүшкен школаның чаа оран-савазын сентябрь айда дооскаш, ажыглалга киирген.
Школаның чаа оран-савазының ажыдыышкынынга аймактың, сумунуң күүсекчи органнарның төлээлери, Тываның күрүне университединиң болгаш Мөңгүн-Тайга кожууннуң Мөген-Бүрен ортумак школазының башкылары, сумунуң чурттакчылары, ада-иелери киришкеннер.
Тывадан барган төлээлер чаа школаның ажыдыышкынынга Тыва Республиканың Баштыңы В.Т. Ховалыгның, Дээди Хуралдың (парламент) Даргазы К.Т. Давааның, өөредилге сайыдының хүлээлгезин күүседип турар Р.Ч. Ооржактың, Тываның күрүне университединиң ректору О.М. Хомушкунуң байыр чедириишкиннерин чедиргеннер. Өөредилге адырынга хөй чылдарда ак сеткилдиг ажылы дээш школаның директору Иргит Зэвгээ уруу Нарантуяаны “Тыва Республиканың өөредилгезиниң алдарлыг ажылдакчызы” атты Тываның Баштыңының Чарлыы-биле байырлыг байдалга тывыскан. ТР-ниң Дээди Хуралының (парламентизиниң) база Өөредилге яамызының хүндүлел бижиктерин, Өөрүп четтириишкин бижиктерин школаның хоочун болгаш аныяк тыва башкыларынга Тываның күрүне университединиң башкызы, улустуң чогаалчызы Мария Күжүгет дамчыдып берген. Тываның күрүне университединиң, Мөген-Бүрен ортумак школазының башкылары чаа школага эргежок чугула ажыглаар өртектиг белектерин сунуп, моон-даа соңгаар кады сырый ажылдаарын күзээннер.
Цэнгэл сумунуң ниити билигниң 2 дугаарлыг тыва школазы 1–12 класстың тыва өөреникчилерин төрээн дылынга өөредип турар бүгү Моолда дың чаңгыс школа дээрзин сагындырып каалы.
Бистиң корр.
Чуруктарны интернет четкизинден хоолгалаан.
“Шын” №88 2024 чылдың ноябрь 16
